Shillong, Jylliew 20: U Chief Executive Member jong ka Khasi Hills Autonomous District Council (KHADC) u Bah Pynsnghiang N Syiem u la wanrah ia ka mang tyngka na ka bynta jong u ne u snem mang pisa 2017-2017, kaba duna T.18490/- mynta ka sngi hapoh ka iing dorbar thawain jong ka KHADC.
Haba kren ba wanrah ia kane ka jingmang tyngka na ka liang jong u CEM, u la kren shai ba ka jingioh jong ka Council kan kham duna na ka daw jong ka jingkhang ia u dewiong bad kiwei ki marpoh khyndew, hynrei na ka liang jong ka Council kan ialeh ban adkar ha kaba pynlut ia ka pisa jong ka Council.
Katkum ka jingmang pisa kaba la mang na ka bynta jong u snem 2016-2017 ka jinglut kan long haduh T.189,47,53,660/- tyngka katba ka jingmih kam long tang kumba T.189,47,72,150/- tyngka, kane ka pyni ba ka don ka jingduna pisa kaba T.18490/- tyngka.
Ha kane ka mang tyngka kaba mynta na ka liang jong u CEM u la ong ban pynkloi ia ki jingtrei kam jong ka Council, ka la dei ban thaw noh ia kawei ka kam hapoh jong ka council kaba ym pat don haduh mynta bad kata ka dei ka kam Architect.
Ha kane ka sngi sdang jong ka jingiashong dorbar la wanrah ruh ia ka jingpynkylla ia ka United Khasi Jaintia Hills Autonomous District (Management and control of Forest) (Sixth Schedule) Bill, 2016, kawei pat ka United Khasi Jaintia Hills Autonomous District fishery (Second Amendment ) Bill, 2016, kiwei ki bill kiba la wanrah ha kane ka sngi ki long ha kaba ia dei bad ki hima kum ka Nongspung, Hima Myrdon, Hima Nobosohphoh bad hima Mawdon.
Ha kane ka sngi ka iing dorbar kala pynpaw ruh ia ka jingsngewlem halor ka jingkhlad noh jong ki ar ngut ki dkhot ba rim jong ka iing dorbar u bah M Mylliem u ba la mih khmat ia ka Mawphlang-Diengiei Constituency, katba u Bah H Shangdiar u la mih khmat ia ka Rambrai, ia ka jingkren sngewlem la sdang da u CEM jong ka KHADC.(SP News)
