Shillong, Risaw 11: U National President ka National People’s Party (NPP) u Conrad K Sangma mynta ka sngi la pdiang sngewbha ia u bah John F Kharshiing sha ka party bad u da kyntu ia u ban khot lang ia ki riew shemphang ban wan sha ka party ban ia trei kam na ka bynta ka jylla bad ka Ri baroh kawei.
Ha kane ka sngi u president ka party u Conrad K Sangma u la kren shai ba ka riti trei kam jong ka party ka artikle kaba ar ka kren shai ba ka party kan iada ia ki riti dustur jong ki rit paid ha kane ka Ri India bad ka jingwan jong u bah John sha ka party ka long kaba don kam namar u la long u nongiasaid ban iad aia ki rit paid.
Ka party NPP ka peit na ka bynta ban kyntiew ia ka Ri India da kaba don ruh ia ka jingpyrkhat ban iada ia ki ri paid bad ka NPP ka shai bha ha ka jingtreikam jong ka ban iada ia ki rit paid ha kane ka Ri India.
U National President ka NPP ba dei ruh u myntri rangbah ka jylla Meghalaya u khot u were ia ki riew rangbah riewshem phang jong ka ba kin pyniasoh sha ka party ban ia treilang na ka bynta ban kyntiew ia ka jylla ha baroh ki liang da ka jingiatrei lang.
U Bah John F Kharshiing ha ka jingkren u la ong ba ka jingrung jong u sha ka party NPP ka long halor ba u la da bihshar bniah ia ki kam kiba kane ka party kala leh, dei hapoh ka jingialam ka NPP ba ka iing dorar kala shim ia ka rai ban pyntrei kam ia ka ILP ha ka jylla Meghalaya ha kaba baroh ki MLA kila ia kyrshan lang.
U Bah John la ong ba katei ka dei tang kawei ka u kwah ban kdew hyrnei ki don shibun ki kam kiba kane ka sorkar kaka leh na ka bynta ki paibah khamtam ia ki nongrep kaba ki nongrep mynta kila sdang ban sngewthuh ia ka jingmyntoi na ki polisi kaba kane ka sorkar kala shim, la ong ba u don ruh ka jingiajan bad u nongseng ka party NPP u PA Sangma.
Kiwei kiba la kren ha kane ka jingialang ki long u bah Sniawbhalang Dhar Working President ka partym u bah Dasakhiat Lamare baroh ar ngut ki mytnri ha kane ka sorkar, ia ka jingialang la pyniaid da u bah Pyniaid Sing Syiem Chairman ka KHADC ha ka jingiadon lang ki nongkyrshan u bah John Kharshiing.
