Shillong, Naitung 19: U Myntri Rangbah ka jylla u Cornad K Sangma mynta ka sngi u la pyntip ba kin ia kren ia ka kam pud bad u myntri rangbah ka jylla Assam u Himanta Biswa Sarma ha Shillong ha ka 23 tarik mynta u bnai, kane kan dang long tang ka jingiakynduh ba kin ia buh ia ka sngi ban ia kren ha Guwahati.
Haba kren ha ki lat pathai khubor mynta ka sngi u u myntri rangbah ka jylla Meghalaya u la iathuh ba kila ia kynduh ha ka meit sngi saitjian ha Guwahahti ha kaba kila ia kren para marwei kaba la neh kumba 40 minit bad ha kane ka jingiakren kila rai ban ia kynduh biang ha Shillong ha ka 23 tarik mynta u bnai.
U Cornad u la ong ba kane ka jingiakynduh ha ka 23 tarik ha Shillong kan long na ka liang jong ka jylla Assam nalor u mytnri rangbah u Himanta Biswa Sarma, yn don lang u Chief Secretary, u Secretary ka tnad poh iing ka jylla Assam.
Na ka liang jogn ka jylla Meghalaya pat ki ban synran lang ia u ha kane ka jingiakren ki long u Chief Secretary ka jylla bad u Additional Chief Secretary ka tnad kam poh iing bad ka tnad san pyrthei. Ha kane ka jingiakynduh ha Shillong kin shim ia ka rai ban ia buyh sngi ia ka jingiakren jong ki ar ngut ki myntri rangbah ka jyllaha ka kam pud kam sam.
U Myntri rangbah ka jylla u Conrad K Sangma u la ong ba kane ka kam ia pynbeit pud kam dei ka kam kaba hap ban shim rai kumne kumne don kam ban ia mir jingmut bad ban ia kren bniah bha bad kam dei ruh ban shu ia peit than sha ki por ba la leit noh kane ka kam kam dei kaba suk.
Haba jubab ia ki jingkylli u myntri rangbah u la ong ba ka jingkren jong u myntri rangbah ka jylla Assam ba ka jylla Meghalaya kala tam pud 53 sien sha u pud jong ka Assam ka dei ka jubab hapoh iing dorbar.
