Shillong, Rymphang 07: Ka dorbar mang tyngka jong ka KHADC na ka bynta jong u snem 2017-2018 kan sdang ha ka 20 tarik mynta, haduh mynta ym pat lah ban ban tip kane ka dorbar mang tyngka jong ka KHADC ka neh hynrei la ioh jingtip ba kan kut pat ha ka 23 tarik.
Na ka liang jong ka seng Congress kan ialeh katba lah ban wad kilad ki lynti kumno ban pynkhynniuh ia ka Executive Committee jong u bah PN Syiem, da kaba khroh ia ki MDC jong ka UDP ba kin ia treilang ha KHADC.
Ki thymmei khubor ki iathuh ba ka seng Congress ka dang iai pyrshang ban ia kren bad ki MDC jong ka seng UDP ym bad ki nongialam jong ka UDP, namar ha poh District Council ka tip shai ba kam don kata ka ain kyntiap seng.
Ka jingpynslem jong u bah PN Syiem ban thung sa ia ki ar tylli ki shuki EM kiba dang lait hapoh jong ka EC kala wanrah ruh ia ka jingeh hapoh jong ka UDP kaba don bun ki MDC hapoh ka iing dorbar kaba 29 ngut.
