Shillong, Lber 07: U Chief Executive Member jong ka KHADC u Bah Teinwell Dkhar u la ong ba ha kane ka Executive Committee kaba un ia lam, ia kaba la tip kum ka United Democratic Alliance kan don 6 ngut ki EM kyntup ia u CEM na ka liang jong ka RDA bad saw ngut na ka PDA.
Haba kren ha ki lad pathai khubor ha dien ba la shimti ia ka kam kum u CEM jong ka KHADC, ha kamra trei kam jong u, u bah Teinwell u la ong ba ka kam kaba kongsan eh na ka bynta ka jong u ka long ban pynbeit ia baroh ki tnad trei kam hapoh jong ka KHADC.
Haba ia dei bad ka Village Adminstration Bill, u la ong ba un bud dien ia ka, hynrei kaba kham kongsan ka long ban wanrah ia ki ain ba pyniaid ryntih ha baroh ki hima. U la ong ba u dang shu shimti ia kane ka kam mynta ka sngi yn dang hap ban peit bha.
Haba ia dei bad ka rukom thung kam hapoh jong ka KHADC, u la ong ba la don kam ban don noh ia ka “Policy Thungkam” kam long kumba kalong mynta. Kane ka dei ka bynta kaba hap ban peit bha, u la kdew kum ia ka tnad engineering wing kaba dang duna shisha.
Haba ia dei bad ki EM ki ban don ha ka EC ka jong u la ong ba hapoh kine ki ar sngi un phah noh ia ka kyrteng sha u Lat jong ka jylla ban ioh noh ia ka jingmynjur ka jong u. U la ong ba ia ki kyrteng ym pat lah ban iathuh.
