Shillong, Jylliew 27: Mynta ka sngi ka Khasi Hills Autonomous District Council kala rakhe ia ka jingdap 68 snem ka District Council ban dei ha kum kane ka sngi la plie ia ka ophis trei kam ha u snem 1952.
Ha ka jingkren jong u CEM jong ka KHADC u bah Titosstarwell Chyne ha kane ka jingdap 68 snem jong ka KHADC u la ong ba kane ka jingpynkup burom ia ki hynriew ngut ki nongtrei ka long ba ka dei ban don ka jingiaid beit iaid ryntih ha ka jingtrei kam, kan don ka jingkitkhlieh ia ka kam kaba la bynshet.
U CEM u la ong ba u dap da ka jingsngewsih ban tip ba ki don kiba trei shitom bad ki don pat kiba shu bam suk, u la ong ba kum u khlieh jong ka KHADC um ban se ban ong ia kane namar haba shim ia ka jingkitkhlieh ban ialam ia ka EC ki don ruh ka jingkit khlieh kaba khraw na ka bynta ki nongtrei ka Council.
Kum ki nongialam ki duh thiah duh dem, khatam lei ha kine ki sngi ba kumno ba ka long ka District Council ha Jiantia Hills ha kaba hynniew bnai ki nongtrei ki khlem ioh tulop, ha Garo Hills District Council khatar bnai ki khlem ioh tulop, pyrkhat phi mynta kim pat mat ha KHADC, hynrei ka lah ban wan ha kawei ka sngi lada kim trei shitom.
La ong ba lada kiba bat ia ka EC kim trei shitom, kum juh ki nongtrei ka KHADC kiba don palat ia ka 600 ngut, kum ki nongtrei ki lah ban don ha kano kano ka bynta jong ka kam kaba la aiti ha ki, ki dei ban don ia ka jingkitkhlieh.
Na ka liang jong u CEM u la ong ba ki don ki nongtrei kiba ong ba ki leit sha jingtrei hynrei kim juh poi sha jingtrei, na ka liang jong ka EC naduh mynta kan shim noh ia ka kaiphot ia ki nongtrei ia kaba la tip kum ka “Annual Confidential Repot”.
Ha ka jingkren jong u bah Pyniad Sing Syiem Lamphang jong ka KHADC, u la ong ba ia ka Sixth Schedule la pynlong doh long snam ha u snem 1950 hynrei ia ka jingplie ia ka United Khasi Hills Autonomous District Council ka long ha ka 27/06/1952 bad ka jingthmu United ha kato ka por ka long ban pynlong kawei ia ki hima khasi bad ia ki jaka kiba la shah synshar ha ki phareng.
Ha ka jingkren u bah Charles Marngar MDC ka Mawhati u la ban jur ba dei ban don ia ka jingsngewnguh ia kito ki nongialam kiba la wanrah ia ka KHADC ban iada ia ka jait bynriew kumba ka long haduh mynta kumne.
Ha kane ka sngi la pynkup burom kyrpang ruh ia u Bah Bindo M Lanong MDC bala rim tam hapoh jong ka KHADC u ba dang dei u MDC haduh mynta. U la shah jied kum u MDC hynriew sien lynter bad mynta u la shah thung kum u MDC bad ha ka jinglong MDC u la bat lut ia baroh ki kam hapoh jong ka KHADC, kum u CEM, Lamphang bad nongialam liang pyrshah.
Ki nongtrei ka KHADC kiba la shah pynkup burom mynta ka sngi ki long, Bah Sharailang Lamare, Bah Khrawkupar Mynsong, Kong Kerbhalin Wankhar, Bah Bnaishon Nongneng, Kong Firsty Lyngkhoi bad u Bah George Badwar.
Ia ka jingialang la pyniaid da u Secretary ka Legislative u bah M Kharkrang bad ia ka jingkren ai khublei la ai da ju judge jong ka District Council Court Bah S Kharsyiemlieh. Ha kane ka sngi la don lang ki EM, ki MDC bad ki ophis jong ka KHADC.
