Shillong, Lber 24: U Lamphang jong ka Khasi Hills Autonomous District Council (KHADC) u Bah Pynshngianglang Syiem haba kren ai khublei ia ka jingshah jied CEM jong u Bah Titostarwell Chyne mynta ka sngi u la ong ba ha kine ki saw bnai jong ka jinglong CEM u Bah Latiplang u la pynsah kyrteng kum u CEM ban pynneh ia ka Autonomy jong ka District Council.
U Bah Pynshngiang u la ong ba ka long kaei kaei kaba sngew tynnad ha kaba ka sorkar kam ithuh ia ka EC kaba la leit noh, hynrei ha kane ka sngi ba don kano ka mat bym don jingshaniah shuh, ka sorkar bad u Lat ka jylla kila ithuh ba ka don ka EC hapoh jong ka KHADC.
U Lamphang, u la ong ba kine ki jingjia baroh hapoh jong ka KHADC ka dei na ka bynta ka jingbha, ha ka juh ka por u la ong ba lada ka long kumno kumno ym dei ban klet ban pynneh pynsah ia ka jinglong laitluid jong ka District Council kaba don la ka jong ka Autonomy.
Ha kane ka sngi u Lamphang u la pynkynmaw ba ka District Council ka don ia ki lai tylli ki bynta, ka iing bishar, ka Executive Committee bad ka Legislative, u la kdew ba kane ka EC kaba thymmai mynta kan hap ban peit ba kan nym jia kum ha GHADC ha kaba 24 bnai ki nongtrei ki khlem ioh tulop, ka JHADC mynta la jan shisnem ka khlem ioh tulop.
U la ong ba wat la ka long kumno kumno ki District Council jong ka thain shatei lam mih ngi jong ka Ri India ki dang phai khmat sha ka KHADC kum ka nongialam ba kum ka nuksa.
Ha kane ka jinglong CEM jong u bah Latiplang, u Lat ka jylla u hap ban ithuh ia u wat la ka sorkar kan ithuh, haba u thung ia ki EM la hap ban leit sha iing bishar ban ioh ia ka jingithuh ia ki saw ngut ki EM bad ha kane ka sngi ba don ka mat bym don jingshaniah shuh ia ka EC ka sorkar bad u Lat kala ai ka jingithuh kaba pura ba ka don ka EC.
