Shillong, Jylliew 17: Ka Myntri ka tnad ka koit ka khiah ka Sorkar Jylla, ka kong Ampareen Lyngdoh mynta ka sngi ka la lum ia ka jingialang bad ka Meghalaya AIDS Control Society (MACS) na ka bynta ban shim ia ki sienjam, ban kham pynjur ia ki program na ka bynta ban ai jinghikai halor ka ban tehlakam ia ka jingsaphriang ka jingpang HIV/AIDS ha ka jylla.
Haba kren sha ki ladpathai khubor, Ka kong M Ampareen Lyngdoh, ka la ong ka jylla Meghalaya ka hap ban pynkhreh halor ki lad ki lynti, ban sdang ban kren halor ka jingpang HIV/AIDS, namar ha ka jingbishar bniah la shem ia ka jingkiew sted kane ka jingpang ha ka jylla kumta donkam ban shim khia halor ki programme bapher bapher ban pynshai halor kane ka jingpang.
“Khamtam ha jaka sor ba kiba don ia ka jingpang HIV/AIDS ki la kiew haduh katta katta, haba iohi ia ka jingkiewsted kane ka jingpang kum ka tnad ka donkam ban shimkhia ban shim ia ki sienjam ba tyngeh. Ngi la iohi ba kane ka jingpang ka la kham kynrei ha kine ki snem ba ka sorkar kan shimkhia pyrshah ia kine ki jait jingma ha ka imlang sahlang” u la ong.
Shuh shuh la bynrap “Ka daw hi ka dei na ka jingpyndonkam lang ia u thyrnia, drug, kaba wanrah ia ka jingiabit ka jingpang HIV/AIDS, kawei ka daw ka long ba ki briew kiba imja na ka kam khaïi met, kane ruh dei kawei ka daw namar ka jingbym leh test ialade ka pynlong ba une u jingpang u saphriang”
Ka kong Ampareen ka la ong, ka sorkar kan ym lah ban tehlakam khlem kano kano ka jingiatreilang, hapdeng ka imlang sahlang. Ki la don haduh 982 tylli ki case thymmai, ki ju mih man u snem kane ka dei kaba pynkyndit bynriew ba dei ban shimkhia noh, ban shim ki sienjam ban tehlakam ia kane.
“Ym dei ban pynrem ia kine ki ba don kane ka jingpang hynrei ka sorkar kan pynthikna ia ka jingshngaiñ ka imlang sahlang, ka tnad kan shimkhia ruh halor ka jingdon ki briew kiba la dep ban test positive ha ka jingpang HIV/AIDS hynrei kumba 15 %-17% ki iehnoh ia ka jingshah sumar, ka sorkar kan hap wad bniah ia ka daw ba ki la ieh ia ka jingshah sumar” ka la ong.
