Shillong, Iaiong 29: Ha dien ka jingialang jong ka party UDP kaba la long mynta ka sngi kala shim ia ka rai ban dawa na u myntri rangbah ka jylla u Conrad K Sangma ban thung ia ka kynhun tohkit kaba lait luid ha kaba ia dei bad ka jingkynnoh bam sap pyrshah hapoh ka Meghalaya Electrical Corporation Limited (MeECL).
Haba kren ha ki lat pathai khubor u president ka party u bah Metbah Lyngdoh u ba dei ruh u shongknor jong ka iing dorbar thaw ain ka jylla u la ong ba u la phah ia ka shithi sha u myntri rangbah ka jylla bad ha kane ka shithi u la kdew shai ba khlem da kdew kti iano iano don kam ban thung ia ka kynhun tohkti kaba lait luid bad ban weng ia kito kiba don ha ka bor ban ioh ia ka jingtohkit kaba laitluid.
Ha ka shithi kaba la phah sha u Myntri Rangbah ka jylla u Conrad mynta ka sngi na u president ka UDP u bah Metbah u la kdew ia ki shiphew tylli mat kiba don kam ban tohkit hapoh jong ka MeECL bad kine ki dei ki mat kiba la kynnoh pyrshah ia ka Corporation.
Ki shiphew tylli ki mat kiba la kdew ha ka shithi ki long ka, Saubhagya Skhim, ha kane ka don ka jingsuba ba ka don ka jingleh bakla ha kaba la kynnoh ba kala wanrah ka jingduhnong palat spah klur tyngka ia ka MeECL.
Haba ia dei bad ki Smart Meters, u myntri kam bor ding ha iing dorbar u la ong ba ka dor ka long T.3400/- tyngka katba na ka jingialang jong ka Board ka kdew ba ka long haduh T.9444.44 tyngka, kano kaba dei bad kano kaba lait don kam ia ka jingshai ha kane ka liang.
La kdew ruh ba ka jingthied ia ki 100 tylli ki kor computer bad ki miej shuki kaba la kot sha ka T.3 lak tyngka na ka Enterprise Resources Planning kala wanrah ia ka jingduhnong da ki klur tyngka.
Ka jingthung ia u Manish Gupta kum nongai buid ia u Chief Managing Director ka MeECL ha ka rukom Pro Bono Basis u ba trei mynta bad ka Arunachal Pradesh bad kane kan ktah ia ka jingmyntoi jong ka jylla.
Haba ia dei bad ka jingthmu ban aiti ia ki 33/11 kv Sub station sha ki kompnei shimet kiba na sha bar ka jylla ban pyniaid kane kan wanrah ia ka jingpyrshah na bun ki liang bad ha shuwa ban pyntrei kam dei ban da pyrkhat sani.
Haba ia dei bad ka jingai dor kyrpang ia ka bai light sha ki karkhana ha Byrnihat tang T.4.90 tyngka ka long kham duna ban ia kaba die sha ki paidbah kane kala wanrah ia ka jingduh kaba khraw ia ka MeECL, nalor kata ka sorkar kala ai ia ka lad ba kin siew tang shisienb ad kane kala wanrah ia ka jingduh kaba T.17 klur.
Ha ka shithi la sngewthuh ba ka jingiadie ia thied ia ka bor ding eleltrik ka long kaba juh leh man ka por bad kane ka jia khamtam ha ka por lyiur, hynrei ia kane la pynsangeh dang shen kane ka jingpynlit light ka dei na ka daw ba ka MeECL kam don ia ka jaka lum ia ka bor ding eleltrik kane kala wanrah ia ka jingduh ia ka MeECL.
Ha ka shithi la kdew ruh ba u CMD jong ka MeECL u la kynnoh ba la lap ba ka don ka jingiatuh ia ka bording eletrik ha ki karkhana ha Byrnihat kane ruh ka wanrah ia ka jingsngewkhai jur bad ka jingthung ia u ophisar ba dang kham khynnah sha ka kam Director kane kan wanrah ia ka jingbym sngewtynnad ha pdeng ki nongtrei ka MeECL kiba la kham ha shuwa.
