Shillong, Jylliew 08: Ki paidbah nongshong shnong jong ka shnong Thiedieng mynta ka sngi kila pynpaw ia ka jingsngew pyrshah jong ki ia ka jingthmu shim jaka jong ka NEEPCO ban tei ka ia ka Umiew stage II Hydel power Project ha katei ka shnong jong ki.
U Bah Joborstarsing Sohtun bad ki paidbah nong ka shnong Thiedieng kaba hap hapoh ka Hima Sohra haba kren ha ki nongthoh khubor mynta ka sngi kila pynpaw ba kum ki paidbah nongshnong shnong kim don jingtip ei ei ruh em ba ka NEEPCO kan shim ia ki jaka rep jaka riang ka jong ki taduh ba kin da la wan ban thew ban woh ia ki jaka.
Na ka liang jong ki paidbah ka shnong ki kynnoh ba kane baroh kadei ka jingleh donbor jong u Freeman Syiem u syiem jong ka hima Sohra bad u Rangbah shnong ba shipor jong ka shnong Thiedieng u Mathaias Syiemlieh. La ong ba ki nongshnong shnong kiba hap ban phet shnong lada kane ka jingtei ia ka dam um kin shah ktah haduh 74 tylli ki long iing, shaei kine ki briew kin phet bad ha ka juh ka por ia ki jaka rep la duh junom.
U bah Sohtun u la ong ba katkum ka RTI kaba kila ioh na ka NEEPCO kam shym don kano kano ka jingiatehkular bad ka shnong Thiedieng, ia ka NOC la ioh na ka shnong Mawphu, hynrei ka jingktah na kane ka Hydel Power Project ka long haduh 97% dei ia ki jaka jong ka shnong Thiedieng, lada ka dei hapoh ka shnong Mawphu kim don jingujor ei ei ruh em.
La iathuh ba dang shen ha ka por ba ka don ka jingpynsngew paidbah ha shnong Thiedieng ha kaba ia dei bad kane ka jaka pynmih bor ding eleltrik, kala mih ka jingiahuri hura ha kaba la jan ia iashoh ia dat namar kine ki kam lyndet kiba la leh da u Syiem jong ka Hima Sohra ha kaba u khlem kynjoh ktien ia ki paidbah nongshong shnong ha kaba ia dei bad kane ka kam.
La iathuh ba na ka liang jong ka NEEPCO kala tyrwa tang T.25000 tyngka shitnum iing ia kiba hap ban phet iing bad ka jingsiew kaba tang T.2000 tyngka kaba man u bnai na ka bynta 20 snem bad ym thung kam u wei na kawei ka iing kaba shah ktah ha kane ka jingtei ia ka dam um. Kim ki paidbah na katei ka shnong kim pdiang ia kane bad lada ki thong da ka tyngka ruh kin nym pdiang namar haba ki duh ia ki jaka shaei kin leit.
