Shillong, Naitung 01: Ki nonghikai jong ka St, Edmund College mynta ka sngi kila ia mih madan ha phyllaw jong ka college na ka bynta ban sdang ia ka jingiakhih kaba khlem buh por namar ka jingshah behkam jong u wei na ki nonghikai hapoh kane ka college u ba la hikai mynta la hynriew snem.
Haba kren ha ki ladpathai khubor u bah Malcom Tariang president jong ka Meghalaya College Teachers Association (MCTA) jong ka St Edmund Unit u la ong ba kane ka jingiakhih jong ki pyrshah ia ka Governing Body jong ka College kaba khlem buh por kala sdang mynta ka sngi bad kane kan dang iaid beteng katba ym pat lah ban ioh ia ka jingdawa jong.
U Bah Tariang, u la iathuh ba ka jingshah behkam jong u nonghikai ka long ba ha u bnai Jylliew kila pynlong ia ka jingiakhih jong ki da kaba deng lama iong hapoh kamra ba dei jong ki nonghikai, hynrei jia ryngkhat ba u wei na ki nonghikai u la mih sa bar bad u la kum ia kren bad ki briew kiba wan ha kato ka sngi.
La iathuh shuh shuh ba na ka liang jong ki bor pyniaid ia kane ka college kila shim ia ka dur kaba mih hapoh CCTV komera bad kila khot hajir ia u bad na ka liang jong une u nonghikai u bah Jeffreyson Wahlang u la ai ka jubab ba u bud ia kaei kaba la bethah na ka MCTA, ha dien kata u la ioh pdiang ia ka shithi ba la weng ia u na ka kam.
Kum ki nonghikai kim lah ban shu sngap ia kane ka jingleh jong ka Governing Body bad mynta ka sngi kila sdang ia kane ka jingiakhih kaba khlem buh por bad ka jingdawa jong ki ka long ba dei ban thung biang ia u tei u nonghikai ba la shah weng na ka kam, lem kumta kin dang iai beteng ia ka jingiakhih ka jong ki.
U Bah F Ropmay Joint Secretary jong ka MCTA St Edmund Unit, u la ong ba kum ka seng ki dawa ruh ba dei ban pynkut noh ia kane ka Governing Body kaba mynta, nalor kata dei ban weng noh ruh ia u General Secretary jong ka Governing body u Brother Saimon Coelho bad ia Julius Stelges ba dei peit ia ki kam pisa jong ka College.
Ha kane ka sngi ki nongialam jong ka seng kmie MCTA ruh kila ia wan lang, ia kaba la wan ban mih khmat da ka Dr B H Buam president, ha kane ka sngi la wan lang ruh ki dkhot jong ka seng KSU ban ai ka jingkyrshan ia ki nonghikai. Ha kane ka sngi kila wan ruh ia ki placard ban pynpaw ia ka jingpyrshah ia kane ka jingshah beh kam jong u nonghikai.
