New Delhi, Rymphang 27: Ka jingiakren kaba 19 ha ka kyrdan ki Home Secretary jong ka India bad Bangladesh kaba tip kum ka Home Secretary Level Talks (HSLT) ka la long mynta ka sngi lyngba ka bor internet.
Kane ka sngi ka long ruh kaba kyrpang namar ka ‘MujibBarsho’ bad ka lyngkhuh 50 snem jong ka thma na ka bynta ka jinglaitluid ka Bangladesh kaba tip kum ka Bangladesh Liberation War bad ka jingsdang jong ki jingiadei hapdeng kine ar tylli ki ri.
Ia ka kynhun na India la ialam da u Ajay Kumar Bhalla, Secretary ka tnat kam poh iing jong ka Sorkar Pdeng. U Sh. Mostafa Kamal Uddin, Senior Secretary, Public Security Division, ka tnat kam poh iing jong ka sorkar Bangladesh u la ialam ia ka kynhun na Bangladesh.
Ka India bad ka Bangladesh ki khein kor bha ia ka jingiadei hapdeng jong ki. Baroh arngut ki secretary ki la pynskhem sa shisien ia ka jingkut jingmut ban pyniar bad pynkhlain ia ka jingiatreilang ha ki kam pynshngain bad ki kam ba iadei bad ki jaka khappud. Baroh ar liang ki la kren shai ba kin ym shah iano iano ban pyndonkam ia ka jaka jong ki na ka bynta ki kam ki ban ktah iwei ia iwei.
Ka la don ka jingiakren halor ka jingpyndep kloi ia ka jingker ha lynter ki jaka khappud hapdeng ka India bad ka Bangladesh kaba tip kum ka Indo Bangladesh Border (IBB) katkum ka jingiakut hapdeng ki Myntri Rangbah Duh jong baroh ar tylli ki ri.
Baroh ar liang ki la iaroh ia ka jingiatreilang jong kine artylli ki ri bad ki sienjam ba la shim ban ialeh pyrshah ki kam pyntriem. Ki la iaroh ruh ia ka rukom treikam kaba ryntih jong ka Coordinated Border Management Plan (CBMP) ban tehlakam ia ki kam beain na shiliang sha shiliang u pud u sam jong kine ar tylli ki ri.
Ki la iaroh ruh ia ka jingpynlong ia ka Police Chiefs’ Dialogue kaba la long ha u Kyllalyngkot, 2021 bad ka jingpyntreikam ia ki rai kiba la shim ha ki Home Minister Level Talk (HMLT) kaba la long ha u Nailar, 2019.
Baroh arliang ki la rai ban pynkhlain shuh shuh ia ka jingiatreilang ban tehlakam ia ka jingkhaii beain ia ki pisa thok bad kiwei kiwei ki mar. Ka Bangladesh ka la pynsngew ia ka jingsngewnguh ia ka India ha ki kam ai jinghikai bad ka jingsdang ia ki kynhun ai jingiada bapher bapher.
Baroh arliang ki la peit bniah ia ki kam ba iadei bad ka jingshngain bad ka jingiadei ha ki kam khappud bad ki la iakut jingmut ban iatrei lang ban pynurlong ia ki jingthmu jong baroh ar tylli ki ri.
