Shillong, Risaw 26: Ka jinglehniam Durga Puja jong ki riew ngeit Hindu ha kane ka jylla Meghalaya kala iaid beit ha ryngkat ka jingbut ryntih ia ki kyndon kiba la buh da ka sorkar namar ka jingdon kane ka khlam COVID-19. Kane ka jinglehniam Durga Puja kala iaid beit ha baroh kawei ka jylla.
Ka jinglehniam kaba lai sngi lynter kaba la sdang ha ka 24 tarik bad la pynkut mynta ka sngi da ka jingbret blei ha ki jaka kiba la buh kyrpang ban bret ia ki blei jong ki ha dien ba la kut kane ka jinglehniam, ha Shillong la pynngam ia ki blei ha wah Umkhrah Shillong.
Katkum ka jingiathuh jong u J L Das Secretary jong ka Central Puja Committee, la ong ba ha kane ka nongbah Shillong ki don 61 tylli ki pandal bad 192 tylli ki don ha ki jaka bapher bapher jong ka jylla bad baroh ki pandal ki long 253 tylli.
La iathuh ba na ka liang jong ki bor jong ka District Administration khamtam ha kane ka nongbah Shillong la buh por ba ia kane ka jingbret blei la sdang ha ka por 10 baje mynstep bad kan kut ha ka por 3 baje noh phai sngi ia kaba la lah ban pyndep shuwa ka por ba la buh.
