Shillong Risaw 28: Mynta ka sngi da ki sphah ngut ki dkhot ka seng Federation Khasi Jaintia bad Garo People bad ki dkhot jong kiwei ki seng bhalang kiba la wan ia shim bynta ka KSU bad HNYF kila wan ban ia shim bynta ha ka jingiaid paidbah banpynpaw halor ka jingeh jong ki samla kiba khlem kam khlem jam ha ka jylla.
Ia ka jingiaid paidbah la sdang na Motphran bad iaid ter ter sha Mawdan Iewrynhep ha kaba kila pynlong ia ka jingialang paidbah ha katei ka jaka, ha ka jingkren u president ka seng FKJGP u bah Dundee Khongsit la ong ba ka jingkyrduh kam ha kane ka jylla kam dei shuh tang ka jingeh jong ka longing longsem hynrei kadei ka jingeh jong ka jaidbynriew baroh kawei.
U President ka FKJGP u bah Dundee Khongsit u la ong ba ka seng kan sa leit ban dawa na ka sorkar ban pyndap noh ia ki kam ba thylli ha ki tnad sorkar bapher bapher bad ban pyntreikam noh ia ka State Employment Policy, ban pynkylla noh ia ki Youth Hostel sha ki Youth Preparation Centre ne ki Youth Guidance Centre na bynta ka jingmyntoi ki samla bad kadei ban buh noh ia ka Meghalaya State Youth Commission ha ka jylla.
U tei u president ba rangbah ka seng FKJGP la ong ba kane ka dei ka jingsdang bad lada ka sorkar kam sngap ia ka jingdawa ka seng ki kloi ban ia khih da kaba tyngeh na ka bynta ka lawei jong ki khun samla. Ka seng kala lap ba ki don haduh 7653 tylli ki kam kiba lait ha ki tnad sorkar, hynrei u myntri rangbah la ong ki don tang 3000 tylli.
U bah Dundee u la ong ba ka rukom thung kam ha kane ka jylla, kam long kaba shai bad kaba khuid namar kata donkam ia ka State Employment Policy khnang ba ka sorkar ka lah ban thep ia ki kyndon ha kane ka polisi ba kino kino ki ophis sorkar pdeng bad ki ophis shimet kidei ban thung kam shwa ia ki paidbah Riewlum.
Ha ka jingkren u president ka KSU u bah Lambokstarwell Marngar u la ong ba ka jingmatlah ka sorkar ha ki 50 tylli snem ka pynlong ia ki samla ba kin mad ia ki jingjynjar.
U la ong ba ka jingwan ki karkhana bapher bapher ha kane ka jylla, ka la khanglad ia ki paidbah bad ka sorkar ka la bakla shi katdei eh namar ba ka la shu ai jingbit khlem da don ki kyndon ba biang.
Ka jingwan ki bar jylla ha kane ka jylla kam dei tang ba ki wan kamai hynrei ki wan kjit bad ki wan ban khanglad ia ki samla ban ieng ha la ka jong ka kjat. Nalor ka kyrduh kam, kan sa poi sa ka por ban sa kyrduh wat ki jaka sah namar ba jyllei ki briew ba wan nabar, ong u bah Lambokstar.
