Shillong, Jymmang 5: U president ka seng A.Chik Dedicated Integrity Leaders u Francis C. Marak u la kren shai ba kum ka jait bynriew Garo kam don bynta eiei ruh em ha kata ka jingiakajia ne ha kata ka jingiakhih kaba la khot da ka All Assam Minority Student Union.
Haba kren ha ki lat pathai khubor ha Shillong Press Club u la ong ba kum ka jaitbynriew Garo ki don ka jingiadei kaba jan bad u paidbah nongshong shnong ka jylla Assam ki Assamese khamtam kiba dei ki hindu bad ka jingiaburom kaba mar kylliang kala don hapdeng jong ki naduh ki por barim bajah.
U nongialam ka seng ADIL u la kren shai ba ka Hatsiqimari ka dei hapoh Assam kumta ym lah ban ktah ia ka khaii pateng kaba hap hapoh ka jylla Meghalaya bad kumba ka long haduh mynta ki surok haba iadei bad ka leit ka wan ka khaii ka pateng ki don bun tylli kam dei tang katei kawei ban pyntikna ba ka jingiakit ia ki mar ki mata ha ka khaii ka pateng ki iaid beit iaid ryntih.
U Marak u don ka jingshaniah skhem ba ka sorkar jylla ka sorkar pdeng kin peit bad pyntikna ba ka jingpynpoi ia ki mar bam mar dih kam dei ban thut namar ba ka Hatsiqimari ka hap ha Assam bad u khot u wer ia baroh ban pyntikna ba kan don ka shongsuk shongsain bad kan nym don ka jingthut ha kaba pynpoi ia ki mar bam mar dih sha Garo Hills.
