The Prime Minister, Shri Narendra Modi addressing at the inauguration and foundation stone laying ceremony of key projects of the Power and Urban sector in Kerala, via video conferencing, in New Delhi on February 19, 2021.
New Delhi, Rymphang 20: U Myntri Rangbah duh ka ri, u Narendra Modi u la ai jingkren ha ka jingialang kaba “6th Governing Council” jong ka NITI Aayog mynta ka sngi lyngba ka video conference.
Ha ka jingai jingkren, u Myntri Rangbah duh u la ong ba ka nongrim jong ka jingkiew shaphrang ka ri ka shong ha ka Cooperative Federalism bad ka jingialang mynta ka sngi kalong ban iaphylliew jingmut ban wanrah ia ki buit ba thymmai khnang ba kin kham long kiba don jingmut bad ban iaid shaphrang sha ka jingiatreilang hapdeng ka sorkar pdeng bad ki sorkar jylla.
U la ong ba ka ri baroh kawei ka la ioh ia ka jingjop haba ki sorkar jylla bad ka sorkar pdeng ki iatreilang ha ka por jong ka khlam Corona. U la ong ba la jied ia ki mat jong ka jingialang ba mynta ka sngi da kaba buh jingmut ia ki bynta ba kongsan tam jong ka ri.
U Myntri Rangbah duh u la ong ba ka campaign ban pynbiang iing sah ba pura sha manla ki briew ba duk ka dang iaid shakhmat mynta. Naduh u snem 2014 ka jingshna palat 2 klur 40 lak tylli ki iing la lah ban pyndep ha ki nongbah bad ki jaka nongkyndong.
U la ong ba palat 3.5 lak ki longiing ha ki jaka nongkyndong ki la ioh umdih hapoh 18 bnai jong ka jingsdang ia ka Jal Jeevan Mission. U la bynrap ba ka Net Scheme na ka bynta ban pynpoi internet sha ki shnong ha ki jaka nongkyndong ka la long ka lad jingkylla kaba khraw. Lyngba ka jingiatreilang ka sorkar pdeng bad ki sorkar jylla ha kum kine ki skhim ka pynsted ia ka kam bad kine ki jingmyntoi ruh ki poi sha baroh ki briew ha ki jaka nongkyndong.
U Myntri Rangbah duh u la ong ba ka jubab kaba la ioh ha ka mang tyngka mynta u snem ka la pynpaw ia ka jingangnud jong ka ri. Ka ri ka la rai ba ka kwah ban iaid sted bad ban nym pynlehnohei ia ka por.
U la bynrap ba ki kompani shimetjong ka ri ki la wan shakhmat ban iatreilang ha kane ka jingiaid lynti jong ka ri sha ka roi ka par. Kum ka Sorkar, ngi dei ban burom ia kane ka mynsiem iatreilang jong ki kompani shimet bad plie lad ha ka campaign AatmaNirbhar Bharat.
U la ong ba ka campaign AatmaNirbhar Bharat kalong ka lynti ban kyntiew ia ka India kum ka ri kaba lah ban pynbiang ym tang ia la ki jong ki jingdonkam hynrei kumjuh ruh ban pynbiang na ka bynta ka pyrthei hi baroh kawei.
U Myntri Rangbah duh u la ong da kaba buh jingmut ia ki jingangnud jong ka ri kaba dang lung kum ka India donkam ban pynbiang ia ki jingdon jingem katkum ka juk mynta. Donkam ban pynshlur ia ka jingsaindur thymmai bad dei ban pyndonkam shuh shuh ia ka teknoloji ban plie ki lad ki lynti na ka bynta ka pule puthi bad ki sap treikam.
U la ban ia ka jingdonkam ban pynkhlain ia ki kam khaii pateng jong ngi, ki MSME bad ki start-up. U la ong da ka jingjied ia ki mar na ki spah tylli ki distrik ha ka ri katkum ki jinglong kyrpang jong ki, ka la iarap ban kyntiew ia ki bad ka la ialam ruh sha ka jingialeh ban leh bha hapdeng ki jylla.
U la kyntu ban shim ia kane katkum ki block, ban pyndonkam pura ia ki jingdon jingem jong ki jylla bad ban kyntiew ia ki kam ban shalan ia ki mar na ki jylla. U la ban ia ka jingdonkam ban don ka jingiatreilang kaba bit ba biang bad ban saindur ia ka policy hapdeng ka sorkar pdeng bad ki sorkar jylla.
U Myntri Rangbah duh u la ong ba ka sorkar pdeng ka la wanrah ia ki skhim PLI na ka bynta ki kam bapher bapher ban plie lad ban kyntiew ia ki kam shna tiar ha ka ri. U la kyntu ia ki jylla ba kin shim kabu ia kane ka skhim bad ban khring ia ka jingbei tyngka ba pura halade bad kumjuh ruh ban ioh jingmyntoi corporate tax ha ka dor kaba duna.
Halor ka jingmang pisa na ka bynta ka jingpynbiang ia ki jingdon jingem ha kane ka mang tyngka, u Myntri Rangbah duh u la ong ba kane kan iarap bha ban kyntiew ia ka ioh ka kot jong ka ri ha ki kyrdan bapher bapher.
U la ban halor ka jingdonkam ban pynlong ia ki jylla kiba lah ban kyrshan hi dalade bad kiba kyntiew ruh ia ka roi ka par ha ka mang tyngka jong ki. U la pynbna ba kan don ka jingkiew kaba khraw ha ka jingpynbiang ia ki bor synshar shnong ha ka 15th Finance Commission.
U la ong ryngkat ka jingpyndonkam ia ka teknoloji, ka jingiashim bynta jong ki paidbah ruh kalong kaba kongsan bha ha ki jingkylla ha ki rukom synshar shnong.
U Myntri Rangbah duh u la ong kumba T. 65000 klur la pynlut ha ka jingthied umphniang bam nabar ri kaba la dei ban poi sha ki nongrep jong ngi. Kumjuh ruh ki don bun ki mar rep, kiba ym tangba la pynmih na ka bynta ka ri hynrei kiba lah ruh ban shalan shabar ri.
Na ka bynta kane, kalong kaba donkam ba baroh ki jylla kin saindur bha ia ki rukom treikam jong ki katkum ka jinglong ka suinbneng bad ka rep ka riang ha ka thain.
U la ong ba la sdang ia ka rukom treikam kaba bniah, naduh ka rep ka riang haduh ka kam ri jingri bad kam ri dohkha. Kumta, ka jingshalan mar rep ka ri ka la kiew bha wat ha ka por jong ka khlam Corona
U Myntri Rangbah duh u la kyntu ban phaikhmat halor ka jingbuh bad jingshna mar na ki mar rep ban pynduna ka jinglehnohei. U la ban ia ka jingdonkam ban shalan ia ki mar kiba ladep pynbha ban ia kaba shalan ia ki mar rep kiba dang im khnang ban kham iohnong.
U la ong ba ki jingkylla kilong kiba donkam bha na ka bynta ki nongrep jong ngi ban ioh ia ka kamai kajih kaba biang, ki jingdon jingem bad ka teknoloji kaba katkum ka juk mynta.
U Myntri Rangbah duh u la ong ba dang shen la wanrah ka jingkylla ha ki kyndon OSP kaba plie lad ia ki samla ban trei na kano kano ka jaka bad ki kam teknoloji jong ngi ki la ioh jingmyntoi shibun na kane. La weng shibun ki jingpyrkhing.
U la ong ba dang shen la pynjynsur ia ka Geospatial data. Kane kan iarap ia ki startup jong ngi bad ia ki kam teknoloji bad kan kyntiew ruh ia ka rukom im kaba suk na ka bynta ki riewpaidbah.
