Shillong, Naitung 04: U Myntri Rangbah ka jylla u Conrad K Sangma mynta ka sngi u la ong ba ka jingialang jong ka Kabinet kala shim ia ka rai ban kyntiew ia ka jingiarap sha ki skul Adhoc ha ka jylla ia kaba la tip kum ka Tulop kan trei kam naduh ka 1st Naitung 2022.
Haba kren ha ki lat pathai khubor la ong ba da kaba shim ia kane ka rai, ka sorkar ka hap ban pynlut tam da T.100 klur tyngka ha ka shisnem, baroh shikatta ka sorkar ka pynlut T.212 klur tyngka da kane ka rai ka sorkar kan hap ban pynlut noh T.312 klur ha ka shisnem.
Ka kabinet kala pdiang ban pynkiew ia ka jingiarap, ia ki nonghikai ha ki Secondary School Leaving Certificate, Higher Secondary School Leaving Certificate bad nonghikai Science, ka jingpynkiew ka long da T.9000/- tyngka kaba mut na kaei kaba ki ioh mynta.
Na ka bynta ki Upper Primary School, Lower Primary School, Nonghikai Hindi, nonghikai bynrap ha ki skul SSA na ka bynta jong kine ki nognhikai ka kabinet kala shim ia ka rai ban pynkiew da T.6000/- tyngka na kaei kaba ki ioh mynta. Ka jingslem ban shim ia ka rai ka dei ba ki hap ban da khien bnai.
U Myntri Rangbah u la ong ba da kane ka jingpynkiew ia ka jingiarap sha ki skul Adoc kiba dei ki skul bala pyniaid da ki riew shimet ka sorkar mynta ka hap ban ot ia ka jingmang tyngka ba kiwei ki skhim, kum na ka PWD, ka Tnad Pulit, wat na ka tnad pule puthi ha ka jaka ban maramot ia ki skul bala jot hap ban siew noh ia ka tulop.
Haba ia dei bad ka jingdawa jong ki nonghikai ban pynkiew tulop da 5% man ka snem la ong ba ka sorkar kam shym la ia kren ia ka kane ka bynta, nama ki skul Adhoc ki dei ki skul jong ki riew shimet. Ia ka jingpynkiew ia ka tulop ki nonghikai Adhoc la leh ha u snem 2017.
