Shillong, Lber 30: Ka ioh ka kot jong kano kano ka jylla ka shong eh ha ki surok, khamtam kum ka jylla Meghalaya kaba dei ka jylla kaba don ha jrong ki lum, ia ka leit ka wan jong ki paidbah la shaniah beit tang ha ki surok.
Haba phai ha ka liang jong ki surok ha kane ka jylla Meghalaya kiba bun bah ki jingkieng ki dang dei kiba shna da ki dieng bad kane kala buh ia ka jingeh ia ki trok ha kane ka juk kaba mynta namar ka jingkit jong ki kali mynta kan long hapoh ka 18 tone katba kine ki jingkieng dieng ki lah sah tang 9 tone.
Kane ka jingdon bun ki jingkieng dieng ha kylleng ka jylla ka la buh ia ki trok ha ka jingeh namar lada kit tang 9 tone kan nym mih tang ka bai umphniang jong ki kali kham tam eh kiba na jngai bad lada kit palat ia kata ruh ka ktah ia ki jingkieng bad kane ka buh ha ka jingma.
La juh iohi na ka por sha ka por ba ki Executive Enginer ki juh pynmih ia ki jingpynbna ba ka khang ia ki kali ban iaid lada ka jingkit kala long palat ia ka khyndai tone. Ka jingdon jong kine ki jingkieng dieng kam dei eh tang ha kawei ka District hynrei ka long ha baroh 11 tylli ki District.
