Shillong, Jylliew 19: Ka seng ki nongthoh kot khasi ka “Khasi Authors Society” kan rakhe ïa ka sngi dap 180 snem ba wan u u kpa ki dak thoh khasi u Thomas Jones ha Ri Khasi ha ka 22 tarik mynta u bnai da laba pynlong ia ka jingliang lyngba ka Webinar ban kynmaw burom ia ka jingdap ka sngi iap kaba 180 snem jong u tei u riew khraw.
Ka phangpdeng jong ka tei ka jingiakren ka ban long ha katei ka sngi ka long “U Thomas Jones u dei u mishonari na ri Wales. U la wan poi ha Ri Khasi ha ka 22 tarik Jylliew, 1841 ban trei ïa ka kam mishon hapdeng ki Khasi.
Mynba une u mishonari u dang trei ïa ka kam ha kine ki lum Khasi, u la pynnoh shibun u synñiang baradbah uba ka jaitbynriew Khasi kam lah shuh ban klet. Katto katne napdeng u synñiang u bynhei ba une u ‘riewkhraw u la pynnoh ki long; ka jingwanrah ïa ki Dak thoh Khasi; ka jingseng ïa ki skul primary; ka jingïaleh ban ïada ïa ka hok u Khasi na ka kti ki English.
Kine ki kam baradbah ki la long shisha ka jingkyrkhu ïa ka jaitbynriew Khasi. Namar kata ka long kaba dei eh ban kynmaw burom ïa kine ki matti jong une u ‘riewkhraw. Dei ha ka snem 2018, ka sorkar Meghalaya ka la pynbna ïar ïa ka 22 tarik Jylliew kum ka Sngi u Thomas Jones.
Ka sorkar kala pynbna ba ki District kiba ha Khasi, Jaiñtia bad Ribhoi kin ïoh ïa ka Sngi Shuti Kyrpang (Special Holiday) manla ka snem kum ka dak ka jingkynmaw burom ïa ki jingtrei une u ‘riewkhraw.
Ha kum kane ka sngi, man la ka snem ka Khasi Authors’ Society ka ju pynlong ïa ki programme bapher bapher halor ki phang kiba don jingïasnoh bad ka thoh ka pule; bad ha kane ka snem namar ka jingdon ka khlam Covid-19 la pynbeit ban rakhe da kaba pynlong ïa ka Webinar.
Ka KAS kala pynbeit ba ia katei ka jingialang yn shim kyrteng ia ki nongiashim bynta, hynrei yn pdiang sngewbha ruh ia baroh katba kiba lah ban peit bad sngap lyngba ka Zoom Video bad kane kan sdang ha ka por 11.00 baje mynstep, ki ban ia pyniaid kin long Dr. Ailynti Nongbri, HOD, Khasi Department, Shillong College.
Ki ban kren ki long u Prof. D.R.L. Nonglait, HOD, Khasi Department, NEHU bad President, KAS, Ka phang: “Ka Thymmei u Thomas Jones”. Bah Phrikshon Kharshiing, Ex-General Secretary, KAS bad ka phang ka long u “U Synñiang u Thomas Jones bad ka jingpyrto ka Jaitbynriew.” La kyntu ia baroh ki nongiashim bynta ba kin ia don haduh kaba kut.
