Shillong, Risaw 25: U bah paul Lyngdoh EM jong ka KHADC mynta ka sngi u la ong ba kim lah ban pdiang ia ka jingpynbna jong ka sorkar jylla ha kaba ia dei bad ka “Building Bye Laws” kaba la pynmih mynta u snem.
Haba kren ha ki lat pathai khubor u Bah Paul u la ong ba ki kyndon kiba la pynmih da ka sorkar jylla haba ia dei bad ki kyndon shna ing kam kren shai ia ki bor hapdeng ka Sorkar bad ki District Council, ka daw ka long ba lada ka jingshna iing ka long palat ia ka 50,000 phut hap ban shim jingbit na ka sorkar jylla wat la ki hap ha ki jaka ki District Council.
La iathuh ba ka sorkar lyngba ka tnad pynroi sor kala khot lai sien ka jingialang ban ia kren ia kane bad na ka liang jong ka KHADC kala kren shai ba ka sorkar kan peit tang ia ki jaka ba dei jong ka sorkar bad ia ki jaka kiba hap hapoh jong ki District Council dei ban peit ki District Council.
Kaei kaba jia pat haba ka sorkar ka pynmih ia ka jingpynbna sorkar ka long da khongpong ia kaba ka KHADC kam lah ban pdiang ia kane ka jingpynbna, ka KHADC kan sa thoh sha ka sorkar jylla ha kaba ia dei bad kane ban ia shai ia ki pud ki sam trei kam hapdeng ka KHADC bad ka sorkar.
Ha ka jingshisha ha u snem 2018 ba ka sorkar ka pynmih ia ka jingpybna kala kren shai ba ha ki jaka jong ka sorkar kan sorkar kan ai ia ka jingbit ban shna iing bad ha ki jaka jong ki District Council kin ai ki District Council bad ha u snem 2019 la don biang ki jingpynnbad mynta kane ka jingpynbna ka long mar khongpong.
Kaba ktah shuh shuh ka long ba katkum kane ka jingpynbna kaba ka sorkar kala pynmih kiba lah ban soi ia ka plan ban shna iing ka long tang ki Engineer bad ki jingohdur kiba la dep ban pass ia ka kyrdan P.Hd ia kaba ymd on kum kita ki briew kiba pass ia katei ka kyrdan ha ka jylla Meghalaya la ong u bah paul Lyngdoh.
