Shillong, Nailur 24: U Director ka Khasi Indigenous Foundation u bah Ninam N Shadap mynta ka sngi u la pynbna ba kin pynlong ia ka jingiakop shad Online ha ka shat riam tynrai ha ka sien kaba Ar.
Haba kren ha ki lat pathai khubor ha Shillong Press Club la ong ba ka jingpdiang ia ki Video shat ha ki riam tynrai kan sdang 10th Risaw 2024 bad kan kut ha ka 20th Risaw 2024, kiba kwah ban ia shimbynta kin phah ia ki Video ha kine number 8131803453 bad 9863799299.
U Bah Shadap la ong ba ka jingthmu ka long ban pynneh pynsah ia ka riam tynrai jong ka jaidbynriew Khasi-Pnar, la ong kumba ka long mynta ka riam tynrai kala sdang ban duh suki suki, kumta ki kwah ban kyrsiew biang ba dei ban pynneh pynsah iala ka jong ka riam tynrai.
La ong ba ia ki jingrwai bad ka riam tynrai kaba kin riam kan long ha k ktien Khasi, Pnar, Maram, Bhoi, War ne kano kano ka ktien kaba la kren, lada ki phah ia ka riam tynrai da ki jingrwai jong kiwei ki jaidbynriew kin nym pdiang.
Ka khusnam kaba kin ai kin don ha ki san tylli ki bynta, ka khusnam kaba nyngkong kan long T.12000/- tyngka, ba ar T.6000/- tyngka, balai T.3000/- tyngka, ba saw T.1500/- tyngka bad ba san T.1000/- tyngka ryngkat ka jingthoh.
La pynshai ba kan nym don kano kano ka jingshim bai rung ne kano kano ka jingdie tiket, baroh kiba ia shim bynta kin ryng ei khlem don kam kano kano ka jingsiew, la leh ia kane ban pynthikna kiba dei ban ia ka jingjop kin dei kiba dei hok shisha katkum ka riam tynrai kaba kip hah.
