Shillong, Naitung 09: Ka KSU seng kmie halor ka jingjia iashoh iadat ba dang shen ha Lawsohtun k
a ioh jingtip ba ka don ka jingshah khot ba khah khah jong ki nongshong shnong na Lawsohtun ha ki pulit. Ki paidbah ka shnong ki ud ba mynta ki shong ha ka jingtieng bad ka jingsyier.
Ka KSU halor kane ka mat kan ym pdiang da leilei ruh em lada ki paidbah khamtam ki samla ka shnong ki shah pyndik man ka por bad ruh ka pyrshah jur lada ka tnad pulit ka thmu ban kem naphang ia ki khun samla ka shnong Lawsohtun.
Ha ka juh ka por ka KSU ka ai ka jingiaroh ia ka Dorbar Shnong Lawsohtun kaba la pyni ia ka jinglong shlur bad stad jong ka ban iada ia la ki nongshong shnong bad halor ka ejahar ba ka la ujor pyrshah ia ka editor ka lad pathai khubor Shillong Times.
Ka KSU kyrshan pura ia kane ka sien jam ba la shim da ka Dorbar Shnong namar ka editor ka Shillong Times ka la kynthoh khlem nongrim ia ki samla ka Jaidbynriew Khasi khamtam ia ki nongshong shnong ka Lawsohtun halor katei ka jingjia.
Ki sienjam ba la shim da ka Dorbar Shnong Lawsohtun ki dei ha ka lynti kiba biang tam namar ka la pyndep ia ka kamram kaba ha khmat jong ka Dorbar Shnong u Khasi ban iada bad ai jingshngain ym tang ia ka shnong hynrei ia ka Jaidbynriew baroh kawei.
Ka KSU ka kyrpad ia baroh ki paidbah ka Bri U Hynñiewtrep ban ai ka jingkyrshan kaba pura ia ka shnong Lawsohtun. Shuh shuh ka kyntu lem ia kiwei ki Dorbar Shnong Khasi ban ia jingkyrshan bad don ryngkat ha kti ha kjat bad ki nongialam shnong ka Lawsohtun.
Ka jingkynthoh ka editor jong ka Shillong Times ka la ktah jur ia ka Jaidbynriew Khasi ha baroh ki liang bad ka lah ruh ban ialam sha ki jingiakynad kiba jur. Ym tang kata, hynrei ka seng ka pynrem jur ruh ia kito ki Khasi padiah khlem bai wai kiba kynthoh ia la ka Jaidbynriew ha ki kotkhubor bad social media, khlem da wad shwa ia ka jingshisha bad ki daw tynrai.
Kum kine ki Khasi ki dei ki ingkhong shyllangmat bad ki sisam khmut kiba shu bud ruma ia ki jingpynbiej jingphon ki mynder shi sngi. Dei namar kine ki jait Khasi ba kwei ki briew ruh ki iuhroit bad khein poh ia ka Jaidbynriew. Shuh shuh kine ki jaid Khasi kim ju pynrem lada shah shoh ki Khasi pat ha kiwei ki Jaidbynriew.
Kane ka pyni shai ba kitei ki Khasi ki dei tang ki tynghung jongno re jongno tang ban ioh jingmyntoi ia lade shimet, kim khein shuh ia ki pateng jong ka Jaidbynriew.
Ka KSU wat lada ka shah kynthoh ha kiba bun rukom, wat lada ki dkhot jong ka ki shah kem man ka por ruh hynrei kan ym riej bad kan ieng rasong beit ban iada ia la ka Jaidbynriew ba ieid lada jia katba jia.
Ha kawei pat ka phang ka seng ka pynpaw ia ka jingsngew bynniaw halor ka jingkiew syndet ka jingsaphriang u khniang corona hapoh jylla ha kine ki sngi, kaba la ryngkat ban ia nujor bad kiwei ki jylla hapoh India.
Ha ka jingshisha baroh shi katto u khniang corona um da ioh rung khlieh than ha ka jylla namar ka jingtrei shitom ka sorkar khamtam ka tnad DHS bad kiwei kiwei ki kynhun treimon sngewbha.
Kane ka jinglah ban tehlakam ka dei,Ka jingtrei borbar ka sorkar, Ka jingkyrshan bad kohnguh ba pura ki paidbah ka jylla, Ka jingshim khia ki Dorbar Shnong khamtam ha ka por lockdown ban pynthikna ia ka jingrung jingmih ki briew bad ban pynbit pynbiang lang ia ki quarantine centres.
Ka jinglen lade ki paradoh parasnam kiba wanphai na kiwei ki jaka ha kaba ynda la poi ha jylla ki pyndep ia ki kyndon ka sorkar bad leit beit sha ki quarantine centres.
Wat lada don na kine kiba don corona ruh hynrei namar ba ki long kiba kohnguh sneng, u corona u kut noh ha met jong ki bad um saphraing pathar sha ki paidbah.
Ka lowkdown ka wanrah ia ka jingeh jingjynjar ia ki paidbah khamtam ia kiba duk, hynrei wat la katta baroh ki pdiang bad bud ryntih ia ki kyndon ka lockdown na ka bynta ka bha ka miat ka jylla baroh kawei.
Ha kine ki taiew la shem ruh ka jingkiew u corona ha ki shipai khamtam ki BSF. Hynrei wat lada la pynlong ia ka BSF camp ha Umpling kum ka containment zone ruh, la ioh jingtip na ki paidbah ba ki shipai hangtei ki rung ki mih katba mon hapoh shnong.
Kane kan buh jingma kaba khraw ia ki paidbah kaba lah ban poi shaduh ka community transmission. Kumta ka seng ka kyntu ba dei ban pynthikna ba kine ki shipai kin ym mih shabar ka camp ban lait na ki jingma hadien habud.
Shuh shuh, ka jingleit iathoh ki 41 ngut sha Khnanapara ha kine ki sngi ka la pynkyndit thret ia kiba bun balang bad kane ka pyni ia ka jingbym khein kine ki briew ia ki kyndon pyrkhing ba la buh da ka sorkar.
Ki kyndon pyrkhing ka iaid ka ieng ka pyni ba kam treikam ia kine ki briew kaba lah ban buh ia kiwei ha ka jingma. Kaei ka bym lah pdiang ka long ba kine ki briew ki la shukor ruh ia ka sorkar haba pan ia ki curfew pass.
Kiwei ki paidbah ki bud ryntih ia ki kyndon ba la buh da ka sorkar, bad lada kine ki 41 ngut kim khein snep ka mut ka jingtrei shitom kiwei ka long lehnohei baroh shi katto.
Ki don kiba bakla bad ki shah dain kuna, ka longkmie ba armet kam ioh leit shah sumar bad kumta ter ter, kumta ka sorkar ka dei ban pynshitom ia kitei ki 41 ngut ban pyni ba ka ain ka treikam ia baroh salonsar.
Ka KSU ka ngeit skhem ba lada ka jingiatreilang kan iai bteng ha kum ki sngi ba la dep, u corona un ym ioh suhthied ha ka jylla, kane ka long katkum ka kyrwoh kaba la phah da u General Secretary ka KSU u Samle Donald V Thabah.
