Shillong, Nohprah 10: Hadien ba tuklar ka Seng ia ka jingthung kam jong ki 164 tylli ki post jong ki staff nurse lyngba ka Meghalaya Medical Recruitment Service Board ka bym shim long kaba beit bad kaba iaid ryntih, ka MMRSB ka la pynduh noh ia ka result kaba rim bad pynmih da kaba thymmai.
Kane ka long hadien ka jingiakynduh ka Seng ryngkat ki nongmihkhmat na liang ki nurse ia Dr. Ampareen Lyngdoh, Health Minister ha ka jingdon ryngkat bad kiwei ki heh sorkar bad ki dkhot jong ka MMRSB ha 30.09.2024.
Na ka liang ka Seng la dawa ban pynduh ia ka result ba rim namar ka bun ki jingkynrum kynram bad ha ka juh ka por badon ruh ki jingkylli kiba bakla, ka jingbym sngewhun ia ka marks ba ki nongialeh eksamin ki ioh bad kiwei kiwei.
Ban pynbeit ia kine kiei kiei baroh, la thaw ia ka Grievance Cell ka ban ailad ia baroh ki nongthoh eksamin ba kin lah ban ujor halor ki jingkylli ba bakla bad kiwei ki bynta bym shim la iaid beit bad ha kajuh ka por ba kin ioh peit ia ka answer sheet ka jong ki ba dei ne em katkum ka marks ba ki ioh.
Na ka liang ka Grievance Cell ka la ioh pdiang haduh 101 tylli ki jingujor na ka liang ki nongthoh eksamin bad la lap ruh ba don bun tylli ki jingkylli kiba bakla. Hadien ka jingshem jong ka Grievance Cell, ka la pynbeit ia kine kiei kiei baroh bad pynmih ia ka result ba thymmai ha 9 tarik u Nohprah, 2024.
Na ka liang ka Seng ka kyntu ia ka Sorkar bad ki bor pyniaid jong ki eksamin bapher bapher ba kim dei ban lehkai bad ka jingim jong ki samla wad kam. Bad haba ki pynlait ia kano kano ka kam, ki dei ban peit khmih ba ki eksamin ki dei ban iaid beit khlem kano kano ka jingpynwit ne jingkynrum kynram kumba iai jia man ka por.
Ka Seng kan ieng rasong ban pyntikna ba ka thungkam thungjam ha ka jylla ka dei ban long kaba khuid khlem noh shiliang shano shano ruh bad kiba dei hok ban ioh ia ka kam kin ioh kita, kane ka long katkum ka kyrwoh kaba la phah da u samla Reuben Najiar Chairman ka Employment Monitoring Cell, KSU.
