Shillong, Jymmang 25: Ka Meghalaya Board of School Education (MBOSE) kala pynmih ia ka result Secondary School (SSLC) ha ka 25/5/2024 katba ia ki kot pule National Council of Education Research and Training (NCERT) yn dang phah shon namar 10 tylli ki subjek la shim na ka syllabus jong ka Central Board School Education (CBSE) na ka bynta ki klass XI bad Klass XII ha une u snem pule 2024-2025.
Katkum ki khubor kiba la ioh da u SP News Agency, ka MBOSE ha ka 21/5/2024 kala khot ia ka tender ban shon bad ban supply ia ki kot pule klass XI kiba dei jong ka NCERT na ka bynta kane ka snem pule 2024-2025,kiba lah ban shon ia ki kot kin long tang kito kiba la ithuh da ka MBOSE.
Ki shiphew tylli ki subject kiba ka MBOSE kala shim ia ki kot jong ka NCERT katkum ka syllabus jong ka CBSE ki long, ka English Core, English Elective, Geography, History Home Science, Computer Science, Informatics Practices, Political Science, Psychology bad Sociology.
Katkum ki khubor kiba la ioh la ong ba la shai ka sngi ka 27/5/2024 ka MBOSE kan dang ai ia ka kontrak sha kito kiba la jied ia ki nongshon kot ba kin shon ia ki kot pule na ka bynta ki khynnah pule Klass XI kiba dang shu pass mynta u snem 2024.
Khlem da pynpaw kyrteng haba la ioh ban ia kren bad wei na ki nongshon kot kiba juh shon ia ki kot skul jong ka MBOSE, kila pynpaw ia ka jingsngew lyngngoh ia kane ka jingleh ka MBOSE, namar da kloi eh ban shon kot kan shim por la kumno kumno 6 taiew katban poi sha ki nongdie kot.
Ha ka jingshisha ka MBOSE haba kala don ia kane ka jingthmu ban kylla ia ki kot pule na ka bynta ki khynnah skul Klass XI, kala dei ban phah shon ia kikot la kumno kumno ha u bnai Rymphang ruh katban mih result la dep hynrei mynta dang hap sdang shon kane kan long ka jingduh ia ki samla pule.
