Shillong, Lber 19: U Myntri ba dei peit ia ka tnad bor ding u James K Sangma haba jubab ia ka jingkylli jong u bah George B Lyngdoh MLA, ha kaba ia dei bad ki karkhana ha ka jylla, la ong ba lada ki karkhna kim siew ia ka bai light mynta u bnai ka MeECL kan ot noh ia ka light ha u bnai Iaiong ban wan.
U Myntri ba die peit ia ka tnad bor ding u la ong ba ka pisa kaba ki karkhana kila siew ha dien ba ki la ioh ia ka jingiarap kaba ia pynbeit ia ka dor ban siew ia kaba la tip kum ka “One Time Settlement” kiba la dep ban siew ka long T.14.36 klur bad kaba ki dang hap ban siew mynta u bnai ka long T.31.18 klur.
Haba jubab ia ki jingkylli bynrap na ka liang jong u myntri u la ong ba kane ka skhim OTS kam dei tang ia ki karkhana hynrei ka dei wat ia ki riew shimet ruh kumjuh, kito kiba la ioh ia ka skhim OTS lada kim siew hapoh mynta u bnai ka jingot ia ka light kan long ha u bnai Iaiong ban wan.
Ha kane ka skhim OTS, ka sorkar ka map 30% na ka bai light bad 100% ia ka jingsiew slem, katkum ka rule 56 jong ka Electricity Act jong ka sorkar pdeng ka MeECL kan ot ia ka bording sha kito bym siew ia ka bai bor ding kumba la ia mynjur lang.
