Shillong, Rymphang 22: U Myntri Khynnah ka sorkar pdeng u Pabitra Margherita u la iaroh ia ka sorkar BJP da kaba u la pynskhem ba ka mang tyngka jong u snem 2025-2026 ka long ban pynbiang ia ka jingangnud ka sorkar ia ka roi ka par, ka roi ka par jong man la ka thain ha ka ri India kynthup ia ka thain shatei lammihngi jong ka Ri India.
Kum ban shu kdew u Pabitra Margherita u dei u myntri khynnah ka sorkar kmie ba peit ia ka tnad karbar ri bad kumjuh ruh ia tnad textiles.
Haba kren sha ki nongthoh khubor halor ki mat ba kongsan jong ka mang tyngka jong ka sorkar pdeng 2025-25 kaba la pynbna dang shen, u la ong ba ka grant-in-aid sha ka jylla Meghalaya ka la nang kiew hapoh ka sorkar NDA.
Shuh shuh u Pabitra u la pynpaw ruh ba sorkar NDA ka la ai shibun ki skhim la ka long hapoh ka DoNER, NEC, ki don ruh ki projek surok, ki projek shna ïing, ki Tourism kiba dang pyntrei kam ha Meghalaya.
U Pabitra u la bynrap ruh ba na ka MSME, ka Meghalaya kan ioh shibun ki jingmyntoi lyngba kane ka mang tyngka jong ka Union Budget.
“Ka Mang Tyngka ka la buh ruh ia ki kyndon na ka bynta ban kyntiew ia ki nongtrei ha sor ha kaba wat ki briew kiba dukkiba don ha ka thain nongkyndong kin ioh jingmyntoi” u la ong.
