Shillong, Naiwieng 14: U myntri khynnah jong ka sorkar pdeng ba dei peit ia ka pla pisa jong ka Ri haba kren ha ka jingialang bad ki heh jong ka NEC ha kaba la don lang ruh ki heh sorkar jong ka jylla Meghalaya lem bad kiwei kiwei u la ong ba ka NEC ka dei ban peit bha kumno ban kyntiew ia ka kiam shangkai pyrthei, ban shna ia ki surok bad ki kam pynmih bording.
Haba kren ha ki nongthoh khubor ha dien ka jingialang u myntri ka sorkar pdeng u Arjun Ram Meghwal u la ong ba kane ka jingialang kaba la long mynta ka sngi ka long ban jurip ia ki skhim kiba la pyntrei bad kiwei kiba dang hap ban leh na ka bynta kane ka thain bad u la bthah ia ka NEC b aka dei ban peit bha ha ki lai bynta, ki kam jngohkai pyrthei, ban shna ia ki surok bad ki kam pynmih bor ding.
U myntri u la iathuh ba u la ioh pdiang ia ka dorkhas mynta ka sngi bad un sa leh ia kaba don kam ha dien ba u la ia kren bad ki ophisar hapoh jong ka tnad pla pisa jong ka sorkar pdeng bad u la ong bay n sa mang pisa shuh sha ka NEC lyngba jong ka DoNER.
La bthah b aka NEC ka dei ban phah shuh ia ki skhim sha ka sorkar pdeng namar ka jingiashong dorbar jong ka Parliament kan long ha ka 16 tarik mynta u bnai. U la ong ba ia ki surok lah ban phah ruh ia ki skhim lyngba jong ka “Bharat Mala”. La ong b aka thong jong kane ka sorkar kaba la ialam da u Narendra Modi ka long ban kyntiew ia ka NE ha baroh ki liang.
Haba jubab ia ki jingkylli ha kaba ia dei bad kane ka jingwengnoh ia ka lut san spah bad shihajar na iew, u la ong ba kito kiba pyrshah ki dei kiba don ia ka pisa bam klop, kan don ka jingeh khyndiat hynrei kane baroh kan sa beit u la ong. Ka sorkar kala bthah ia baroh ki bank ba ki dei ban peit ba ki paidbah kin nym ia kynduh jingeh.
