Shillong, Kyllalyngkot 15: Ka NEIGRIHMS ha ka jingiaipyrshang jong ka ban don da ki briew kiba bniah bad tbit bha ha ka kam, dang shen ka la iakren bad ka Ministry, na ka bynta ba kan ia pyrkhat bad ioh jingmynjur ban sdang ia kiwei pat ki shnat jingpule ha ka Post Graduate Programmes, MD/MS .
Ki shnat pule kiba ka NEIGRIHMS kala dep ban ia kren bad ka tnad ka koit ka khiah jong ka sorkar pdeng ki long, ka Tnad Dermatology, Ka Tnad ENT,Ka Tnad Ophthalmology, Ka Tnad Pharmacology,Ka Tnad Forensic Medicine bad ka Ka Tnad Biochemistry.
Kane kan iarap ia ka jingduna jong ki briew kiba tbit ha ka kam khamtam ha ka jaka pule kum ka NEIGRIHMS, kaba don kham jngai na kiwei ki nongbah.Ka don ka khubor halor ka phang ba ka NEIGRIHMS ka phah ia ki Paediatric cases sha kiwei pat ki Hospital kiba don ha ka jylla.
Halor kane ka phang, la pynshai hangne ba ia mynta hi kane ka Hospital ka dang buh ha ka kam ia ka Gas Manifold Systems ha ka Paediatric Intensive Care Unit (PICU) bad ha Paediatric Ward kaba lah ban shimpor kumba 7 (hynniew) sngi eiei ban pyndep. Ha kane ka por, khnang ban kiar na kino kino ki jingktah ia ki nongpang, ia ki nongpang la pynkynriah noh shwa sha kiwei pat ki Hospital.
Ha ka juh ka por, ka Tnad Paediatric ka la iakynduh bad ka jingduna jong ki nongtrei namar arngut na ki Faculty kiba trei shipor , ki la kut noh ka por ban trei bad ki arngut kiba la thung thymmai ha ka kyrdan jong ki Assistant Professor ha ka Paediatric, ki la pan ban kham pynjynsur ia ka por ba kin wan ban trei.
Kane ka jaka pule ka pyrshang ia ki lad ki lynti ban don ki Faculty ha ka por ba biang nalor ban kham pynbha shuh shuh ia ka jingai jingshakri kaba pura sha ki nongpang.
Mynta ka sngi, ia ka Lecture Theatre-I kaba la pynbha shuh shuh la plied da u Director ka NEIGRIHMS ha ka por 10:30 mynstep ha ka jingdon ryngkat bad u Secretary Ka Koit Ka Khiah, Ka Tnad Ka Koit ka Khiah jong ka Sorkar India ha Nirman Bhavan, New Delhi.
Lyngba kane ka Lecture Theater, ia ka video conferencing bad ki telemedicine project yn sa lah ban ai bynta lang bad kiwei pat ki jaka pule kynthup ia kiba don ha ka phang Shatei Lam Mihngi jong ka Ri.
