Shillong, Naiwieng 03: U president jong ka seng Meghalaya Mine Owner’s bad Exporters Association (MMOEA) u Bah Nassar Marwein, u la kynnoh ba kane ka sorkar congress ha ka jylla Meghalaya ha ka jaka ba kan shna ia ka polisi ba ki trai jaka kin lah ban ioh ban tih dewiong, ka mut ban knieh noh pynban ia ki jaka ban aiti sha ka Meghalaya Minerals Development Corporation (MMDC).
U Bah Marwein, u la ong ba ka sorkar ka tip shai kdar ba ia ka khydnew ka shyiap ha kane ka jylla la long trai da ki briew shimet, ka hima, ka kur bad ka sorkar kam don jaka lada ka don kam ka hap ban thied na ki paidbah, hynrei ha kaba ia dei bad kane ka kam dewiong kaba la ktah ia ka kamai ka jih jong ki paidbah bad kum juh ia ka pla tyngka jong ka sorkar, ha ka jaka ba kan shna ia ka polisi kaba ki trai khyndew ki trai jaka kin ioh ban tih ka kwah pynban ban aiti sha ka MMDC.
Na ka liang jong ka MMOEA bad ki paibah jong ka South West Khasi Hills da lei lei kin nym leit ban aiti ia ki jaka sha kata ka MMDC kaba dei ka corporation jong ka sorkar, la ong “Ngim kwah ban duh ia ki jaka la jong ngin long ki trai halor ki jaka puta”. Ka jingmih ha ki lad pathai khubor ba la bun ki trai kiba la leit ban aiti sha ka MMDC kane ka dei tang ka jingmut dur jong ka sorkar.
U bah Nassar u la ong ba ka seng MMOEA ka buh ka jingkylli ia ka sorkar, haba katta snem la khang ia u dewiong balei kam lah ban shna ia ka polisi khang ba ki paidbah kin ioh ban but ia kita ki polisi kaba ka sorkar kala shna, kaei ka jingthmu jong ka sorkar sha lyndet ban ong ia ki trai jaka ba kin leit ban aiti ia ki jaka sha ka MMDC ban ioh tih dewiong ha kaba ki trai jaka kin ioh tang ka kommision.
U Bah Nassar u la ong ba kum ka seng badki trai jaka da lei lei kin nym leit ban aiti ia ki jaka sha ka MMDC, hynrei lada ka sorkar ka shna ia ka polisi na ka bynta jong ki paidbah ba kin lah ban but ia ki kyndon ki kloi ban but ban tih ia u dewiong katkum kata ka juk stad saian kaba mynta, hynrei kane ka jingong ban leit ba aiti sha ka MMDC ban ioh tih dewiong ka long ba ka sorkar ka kwah ban knieh noh ia ki jaka puta jong ki paidbah ban pynkylla khyndew sorkar la kynnoh u bah Nassar Marwein president ka MMOEA.
