Shillong, Rymphang 06: Ka Meghalaya Pradesh Congress Committee (MPCC) ka pynpaw ia ka jingsngewsih kaba jur halor ka jingkhlad noh jong ki nongbylla tih dewiong ha shnong Mynsngat ha ka jingbethei dynamite ha ka krem dewiong kaba la tih khlem jingbit ha EJH District.
Ka seng Congress ka ong ba kane ka jingjia ha Mynsngat ka thain Thangsko ka kren ia ka jingdon ki briew kiba tih dewiong khlem jingbit bad kane ka long namar ba ka sorkar Meghalaya kam shym leh ei ei ban khang na ka liang jong kito kiba bat ia ka bor.
Ha Meghalaya ha u snem 2014 k khang ia ka jingtih dewiong beain bad ia kane la pynskhem da ka iing bishar kaba ha khliehduh jong ka Ri India hynrei kane ka jingtih dewiong beain ka dang bteng haduh mynta, haloir kane ka iing bishar ka High Court Meghalaya kala buh maham ia ka Katakey Commission hynrei kane ka sorkar kaba la ialam da ka NPP kam shym la lah ban khang.
Ka party Congress ka kynnoh ba kane ka jingdon ka jingtih dewiong kaba khlem da ioh jingbit kam dei kaba shujia hangne hangtai hynrei ka dei kaba la da pyniaid ryntih namar la shah ba kin bteng ia ka jingtih dewiong bad kane ka dei namar kim don ki bor jong ka ain ban peit.
Ki nongbylla ki lah ban dei kiba wan na shabar ban bylla ne ki lah ban dei ki briew na kane kajylla, ka party Congress ka dawa ba dei ban buh ia ka jingkitkhlieh la ka dei iano iano ruh kam dei ban long tang ia kiba don ha ki kyrdan kiba hapoh, dei ban pynshitom mardor ia ki ophis kiba don ha East Jaintia Hills.
Ka sorkar ka dei ban khang syndon noh ia baroh ki jaka tih dewiong beain, ka sorkar ka dei ruhban siew ia ka bai lutksan kaba biang sha kito ki long iing kiba mat ia kane ka jingjia kaba sngewsih.
Ka party ka phah ia ka khubor sngewslem sa kiba ha iing ha sem jong kiba khlad, ka sorkar jylla ka hap ban shim ia ka jingkit khlieh ha kaba ia dei bad kane ka jingjia kaba sngewsih ha ka jingkhlad ki nongbylla ha ki jaka tih dewiong khlem da ioh jingbit.
