Shillong, Kyllalyngkot 20: U Myntri rangbah ka jylla u Conrad K Sangma haba jubab ia ka jingkren u nongialam ka liang pyrshah u Dr Mukul Sangma bad u Bah Adelbert Nongrum halor ka jingweng noh ka sorkar pdeng ia ka ktien “jylla ba kyrpang” u la ong ba sorkar ka dang dawa ba ia ka jylla Meghalaya dei ban ithuh kum ka jylla ba kyrpang.
Haba batai ia kane u myntri rangbah u la ong ba dei ha u snem 2014 haba ka sorkar pdeng kala pynkiew ia ka bhah jingmang ia ki jingioh ia ka khajana na ka 33% sha ka 42% hapdeng ka sorkar pdeng bad ki sorkar jylla, ka sorkar pdeng kala weng ia shibun ki skhim halor ka nongrim ba la pynkiew ia ka mang bha tyngka katkum ka kaiphot jong ka Fourteen Finance Commission.
U myntri rangbah u la kubur ia kaei kaba la kren da u nongialam ka liang pyrshah ba bun ki skhim la shah ot, hynrei ka jingbei pisa ia kiba bun ki skhim ha ka jingiathep pisa lang ia kaba la tip kum ka ratio 90:10 ka dang beteng haduh mynta ruh, hynrei ka sorkar ka dang iai dawa ba dei ban ithuh ia ka jylla Meghalaya kum ka jylla ba kyrpang.
Haba ia dei bad ka jingsiew ia ka khajna kaba ia dei bad ka jingioh ia kaba la tip kum ka Income Tax, u myntri rangbah u la ong ba ka sorkar jylla kala ia kren ia kane ka kam bad ka sorkar pdeng, kaei kaba jia kum ba la kdew da u nongialam ka liang pyrshah ba ki kot ki bor ki pynmih hi ia ka rukom sei bad thep pisa ki paidbah.
