Shillong, Iaiong 29: U Myntri ka tnad pule puthi jong ka jylla u bah Lahkmen Rymbui u la iathuh ba ka sorkar kala dep ban thung palat 1000 ngut ki nonghikai ha ki Upper primary bad Lower primary School jong ka sorkar ha baroh kawei ka jylla.
Haba kren ha ki lat pathai khubor u myntri u la iathuh ba kane ka jingthung kam ia ki nonghikai kiba la pyndep ia ki kyndon kiba ka sorkar kala buh ka dang iaid mynta ruh ban pynbiang ia ki nonghikai sha ki jaka pule kiba dei ki skul jong ka sorkar.
Na ka liang jong u myntri u la kyntu ia ki shnong ki thaw ba kin don lem ia ka jingsngewtrai ia ki skul ban ia peit ba ki nonghikai kiba la thung ha ki skul ki dei ban don ha ki jaka ba la buh ia ki bad lada kim don ki lah ban ujor bad ka sorkar kan leh ia kaba don kam pyrshah ia ki.
Na ka liang u myntri u la pynpaw ia ka jingsngewsih ban iohi ba palat 900 ngut ki nonghikai kila duh kam, hynrei ka sorkar kam lah ban shu thung kontrak sah ia ki nonghikai dei ha kane ka ruko ba ka sorkar kala shim ia kane ka rai ban thung da ki nonghikai ba pura.
Ka sorkar kala pynkynriah ruh ia ki nonghikai na ki skul kiba duna ki khynnah sha ki skul kiba kham bun ki khynnah bad kane ka long ban pynthikna ba kawei kawei ka skul dei ban duna ia ki ar ngut ki nonghikai.
Haba ia dei bad ki skul kiba ym don khynnah ka sorkar kan sa shim ia ka rai ha dien ba la ioh ia ka kaiphoit kaba pura na baroh kawei ka jylla, ia mynta ym pat lah ban ong ei ei ha kaba ia dei bad ki skul ki bym don khynnah pule.
