Shillong, Lber 20: U President ka Khasi Students Union (KSU) u bah Lambokstarwell Marngar, u la phah ka khubor ka ba shai sha ka Sorkar Jylla ba kam dei ban thombor halor ka mat ban wanrah ia ka lynti rel ha ki thaiñ ka Bri u Hynniewtrep, ia kane u la kren ha ka jingialang ba la pynlong ban leh burom ia ka lyngkhuh snem kaba 47 jong ka seng, ha khmat u mot sah nam ka seng ha Lachumiere Shillong.
Ha ba kren hakane ka sngi u bah Lambok u la ong Kane ka sngi ka dei ka ban pynkynmaw ia kita ki 47 tylli ki mawmer ki mawjam ba ka seng ka la iaid, ki 47 tylli ki snem Kim dei halor ka nam bad ka burom hynrei ka ksu ka trei ia ki kam ban shongshngain ka jaitbynriew.
“Ha kine ki sngi ka KSU ka la iai kren bad pynkynmaw ia ki mat bapher bapher, 12 snem mynshwa la sdang ki phliah ding ki ban pynkynmaw ia ka sorkar ba ngi kwah ia ka ILP, ha ka jingiaid lynti ha u 2019 ka sorkar ka la pass da ka resolution hynrei haduh mynta dang hap ap sah ia ka rai ka sorkar India,Ka jingkylli hangne ka long ba wat ka aiñ kaba la don lupa kata ka MRSSA shano ka don bad balei ka sorkar Kam lah ban pyntreikam haduh mynta?” la ong u Lambok.
“Ki Dkhot ka jaitbynriew kim dei ban kylli tang ia ka KSU ba ka la leh aiu hynrei kylli lang ia ki ba don ha ka Sorkar kaei ba ki la leh ha secretariat haba la phah ia ki ban thaw ia ka aiñ. Katba ka KSU ka dang ia kren halor ki aiñ ban iada ia ki jaitbynriew hynrei mih sa ki briew ki ba ong ba ki kwah lynti rel” u la bynthen.
U la ong “Ko ki lei san snem wat kwah ban ai ding ia ka KSU namar ngi kwah ban pyntreikam ia kita ki aiñ ki ba iada ia ka jaitbynriew bad lada ki pyrshang ban thombor kum ha u snem 2017, kane kan long tang ka jingsdang bad lada ki thombor sa mynta ka kynti 1000 ngut ngi kloi ban rung ha ka along, Ngi phah ia ka kyrwoh, ban pynheh lupa ia ka District Jail namar ka KSU kam dei kaba shu heh tang ka tyngam, hynrei ngi ia khun ha madan, ka jingshah kynthoh ka seng kan dei ka jingim bad ka jingshongshngaiñ ka jaitbynriew”
U la ong ba ka seng ka khot ngi wer ia ki paradoh parasnam ban ai ka kti ka diang kti ka mon na ka bynta ka jingiaid lynti ka KSU bad ka jaitbynriew ka long kumne mynta dei ba ka KSU namar ba ka dang ring bad pynhiar mynsiem ki paradoh parasnam khamtam ia ki kmie ki kpa jong ki para dkhot ki ba ju don ryngkat ha kane ka jingiaid lynti ka KSU.
