Shillong, Iaiong 29: U President ka Meghalaya Commercial Truck Drivers and Owners Association (MCTOA) u bah Mosklandar Marngar u la ïathuh ba ka sorkar ka la pan por shi bnai ban maramot ia ka jingkieng ha Mawlyngdep kaba pyniasoh ia ka surok na Lad Umsaw sha Mawmaram.
Haba kren sha ki lad pathai khubor hadien ka jingïalang bad u symbud myntri rangbah ka jylla ba khmih ia ka tnat PWD (Road) u Bah Prestone Tynsong, u President ka MCTOA u bah Mosklandar u la ong ba u symbud myntri rangbah u la pyntip ba ka jingkhang ia ki kali ba khia 9ton ban iaid ka dei namar ka jingsdang jynsor ka jingkieng ha Mawlyngdep.
U bah Mosklandar u la ïathuh ba na ka liang ki trai kali bad ki nongniah Trok ki la pynpaw hakhmat u symbud myntri rangbah halor ka jingeh jong ki ban pynpoi ia ki mar mata shaki paidbah hadien ka jingkhang ia ki trok ban iaid na ka surok Lad Umsaw sha Mawmaram.
U la ïathuh ba naka liang u symbud myntri rangbah u la kular ba ka tnat PWD kan shna ia ka Subway bad ha kajuh ka por ban maramot ia ka jingkieng khnang ban shah biang iaki trok ban iaid.
“U bah Prestone u la kular ban pyndep iaka Subway bad ban maramot iaka jingkieng ha Mawlyndep hapoh shibnai khnang ba ki trok kiba kit palat 9ton ruh kin ioh ban iaid biang na Lad Umsaw sha Mawmaram” la ong u Bah Mosklandar.
U bah Mosklandar u la ïathuh ba haka jingïalang ka MCTOA ka la kyntu ruh ia ka sorkar ban wad da ka surok thymmai ban shah iaid ia ki trok katba ka tnat PWD ka dang pyntrei ia ka Subway bad ia ka jingkieng.
“U symbud myntri rangbah un hap ban ïakren pynbeit shwa bad u SP East Khasi Hills bad SP (Traffic) bad ka tnat Transport ban wad surok ban shah iaid ia ki trok namar ki kali kiba iaid na Lad Umsaw sha Mawmaram ki don da ki spah tylli namar lada ki trok ki iaid na sor Shillong bad lada tang 4-5 tylli ki trok ki dihsha shiteng lynti, ki paidbah hi kin ngat ia ka jingeh namar ka jingdheng kali” u la ong.
