Shillong, Risaw 09: U Myntri ka pule puthi, u bah Lahkmen Rymbui u la pynkup burom iaka jylla mynta ka sngi halor ka “jingpyrshang lang ban pyntreikam iaka National Education Policy (NEP) 2020: Ki mat, jingiakhun bad ki lad ki lynti ban wan,” ha kaba ia kane ka prokram la pyniaid da ka Directorate of Educational Research and Training (DERT), Meghalaya, Shillong.
Ha katei ka prokram, u bah Rymbui u la kren shaphang ki mat ba kongsan ha kaban pyntreikam iaka NEP 2020 ha ka jylla Meghalaya, da kaba kyrpad iaki paidbah ban trei shitom lang bad ki lad pynbeit kiba bit ban pynneh iaka jingpyntreikam kaba biang bad ka jingroi jingsan kaba pura jong ki khynnah skul.
U la pynpaw iaki mat ba kham kongsan, kynthup iaka jingsam iaki tiar ki tar hapdeng ki skul ba don hapoh ki rukom pyniaid bapher, ki jingeh ba iadei bad ka ktien, ka jingduna nonghikai, ka jingai jinghikai ba ryntih iaki nonghikai, ka jingshaniah iaki jaka ai jingpule shimet bad ka jingpyndonkam kaba biang iaka teknoloji ha ka pule dangle.
Da kaba ban jur halor ka jingdonkam jong ka jingpyn kynthup bad ka jingia jinghikai iaki khynnah pule kaba don nongrim, u bah Rymbui u la ong ba ki kamra skul ki dei ban don ka jingpyn iadei bad ba sngewtynnad, kaba pynioh iaki khynnah pule ka lad ba kin pyni bad pynroi la ki sap ki phong jong ki.
U la ong ba ka jingnang jingstad ka dei ban pyniar shabar na ka rukom pule kaba pynleit tang ha ka resol ne jingpass iaki eksam, da kaba kynthup lang iaka jingpynroi iaki sap ki tynrai bad ki jingpule kiba lah ban pyndonkam shisha ha ka imlang sahlang, khnang ba ki khynnah pule ki lah ban bud ia kiei kiei kiba ki sngewtynnad bad ban pynkhreh ialade na ka bynta ki kabu bad ki kam ki jam ha ka lawei.
U bah Lahkmen u la ong ruh ba ka jingiakhun jong ka jingbuh iaki polisi jong ki lai tylli ki ktien ha Meghalaya, ka ai iaka jingbun jait ki jait ktien ha ka jylla bad ka jingkylla ka jingdon ki nonghikai ha ki rukom pule bapher bapher. U la kren shaphang ka jingdonkam jong ki nonghikai ban ioh jinghikai man ka por bad ka jingpynshisha ba ka jingstad kaba ioh lyngba ki prokram kum kita ka kylla long ka jinghikai kaba kham bha ha ki klas.
U la kren ruh shaphang ka teknologi ha kaba u la kyrpad ba dei ban don ka jinghikai ba shai bad ban biang ki tiar ki tar khnang ba kan iarap iaki nonghikai bad ki skul ba kin pyndonkam da kine ki teknologi kiban pynsuk iaka rukom hikai bad ka pule dangle.
U bah Rymbui u la pynkut ia katei ka prokram da kaba ong ba u la pdiang iaki jingeh kiba mih na ka jingduna ki lad ki lynti, ka jingduna ki iingskul bad ki tiar ki tar bad ka jingduna ki nonghikai bad u la kyntu iaki baroh kiba iadon bynta ban iatreilang lyngba ki jingiakren kiba donkam bad ki kam ba lah ban leh ban pynkhlain iaka rukom pule puthi ka jylla.
Katba u Commissioner bad Secretary, ka tnad pule puthi, u Vijay Kumar Mantri u la ong ba ka jingiaid jong ka jylla ha kaban sdang iaka NEP 2020, khamtam ha ki kyrdan pule ba dang sdang, jingsdang kyntiew iaka jingnang jingstad, jingnang jingstad lyngba ka jingmad, ka jingshakri lane pule pynroi kaba teh ha ka sap bad ka jinglah, ha kaba u la pynpaw shynna ba ka jingpyntreikam kaba biang bad kaba trei kam kadei kaei kaba kongsan tam.
Kane ka prokram ka ai iaka rynsan na ka bynta ki nongkitkhlieh ban pynlong iaka jingiatai halor ki jingeh ha ka rukom treikam bad ban wad iaki lad ki lynti ban kyntiew iaka pule puthi kaba kynthup ia baroh bad kaba biang ha Meghalaya.
