Ka sur u paidbah ka Bri u Hynniewtrep ka pyrshah jur ban wan rah briew na sha bar: HS Shylla

Shillong, Jylliew 01: U Bah HS Shylla Chairman jong ka group kaba la ai kyrteng Ka sur u paidbah ka Bri u Hynniewtrep, mynta ka sngi u la ong ba kum ka kynhun ka pyrshah jur ia ka sorkar ban wan rah ia ki nongtrei kiba na sha bar ha kane ka kynti kaba mynta.

Haba kren ha ki lat pathai khubor mynta ka sngi ha phyllaw jong ka State Central Library u la ong ba ka jingpyrshah jong ka kynhun ia katei ka rai jong ka sorkar ka long ba ha kiwei ki jylla kum ka jylla Assam kaba mar jan kane ka jingpang COVID-19 ka dang jur bha bad kum juh sha kiwei ki bynta jong ka Ri India.

La kdew ruh ba kane ka jingpang kan dang kiew ha u Natiung u ban wan katkum ka jingkdew jong ki stad, kumta ban wan rah ia ki briew kiba la don ka jingtbit kyrpang ha ka kam ne kiwei kiwei kan long ka jingma ia ka jylla ba ioh kine ki briew ban wan kin long ki nongwanrah ia kane ka jingpang.

La buh ruh ka jingkylli ba kumno ka sorkar Meghalaya tang ban pynshong quarantine ia ki briew jong ka jylla kiba don na sha bar jylla ruh ka shem jingeh bad ka phah leh ia kata ka Home quarantine, lada wan sha kine ki briew haei ka sorkar kan pynleh quarantine ia ki u la kyllai.

Haba peit tang ha ki Bus kiba kit ia ki nongtrei sorkar ruh ka sorkar kam lah ban pynbiang kali ha kaba ki nongtrei sorkar ki hap ban ia shong khap ngiah bad kim banse ban pynkhien ia ki kyndon ba la buh da ka sorkar kiba hap ban leit da ki juh ki bus.

La kynnoh ba kane ka jingleh jong ka sorkar kam pyrkhat ei ei ia ki briew jong ka jylla, ia ki nong bylla, ki nongrep bad kum ka jaidbynriew kam pat klet ia ka jingshah pyniap jong u Bah Lurshai Hynniewta ka sorkar ka leh aiu halor kane, kaba phylla ka long ba kane ka sorkar kala da pyrkhat ia kita ki briew ban wan rah na sha bar ka jylla.

La pynkynmaw ba kumno ki seng bhalang kila dawa ia ka ILP kaba khlem pat lah ban pynurlong haduh mynta ba wat ka sorkar ruh kala ieng halor ka nongrim ban ai ia ka ILP ha ka jylla, la ong ba bun ki ain kiba la thaw da ka KHADC ki dang sah kut haduh mynta lada ka sorar kam pat lah ban pynioh ia kitei ki jingdon kam lem kumta ka kynhun kan pyrshah ia ka rai jong ka sorkar.

Ha ka juh ka por ka kynhun ka Sur u Paidbah ka dawa ba ka sorkar ka dei ban pynshai halor ka jingthied ia u khaw na ka FCI u ba la kot sha ka 11,276 Metrik tone, ka sorkar ka dei ban ai ka jingpynsha ba kumno la pyndon kam ia une u khaw ba la thied na ka bynt aki paidbah.

What Next?

Recent Articles

Leave a Reply

Submit Comment

*