Shillong, Lber 04: U symbut Myntri Rangbah ka jylla u bah Prestone Tynsong haba jubab ia ka jingkylli u bah Lahkmen Rymbui la ong bala shah ban iaid ia ki kali ha jingkien Umiam tang kiba kit hapoh ka 9 Ton bad ka pynieng jong ka kali kam dei ban palat ia ka 2.80 metre.
Ka jingpynkhreh ban shna ia ka surok ban iaid 4 tylli ki kali na Umiam sha Shillong la leh da ka NHIDCL ia kaba la aiti da ka tnad shna surok jong ka sorkar pdeng bad kane ka jingpynkhreh ka dang iaid sha khmat.
Haba jubab ia ka jingkylli bynrap u symbud myntri rangbah ba dei peit ia ka tnad shna surok ka jylla la ong ba ia mynta ki jingshna ia ka surok VIP ka dang iaid sha khmat bad ki don ruh kiwei ki surok ba ki kali kit jingkit bad ki night super ki lah ban iaid ban poi sha Shillong.
Haba pynshai ia ka lynti ba kane ka surok 4 lane ka ban sdang na Umiam sha Shillong kan iaid lyngba na ICAR, sha jaka MeECL, sha Industrial area, kan noh sha wah Umiam na sharum ka jingkien kaba mynta kan poi shajan marten bad kan mih sha Umshyrpi.
Na ka liang jong u myntri u la kubur ba kala don ka jingkiewdor ha ki mar ki mata na ka daw ba ki kali kit mar kila hap ban iaid lyngba ka Shillong bye pass ban poi sha Shillong, kane ka dei ka jingshisha ka la wanrah ia ka jingkiewdor ha ki mar ki mata,ki tiar ki tar.
