Shillong, Risaw, 06: Ka Department of Commerce and Industries sorkar Meghalaya kan sa pynlong iaka bynta ba ar jong ka Reverse Buyer Seller Meet (RBSM 2.0) ha ka 8 bad 9 tarik Risaw ha State Convention Centre, lem bad ka jingmut ban pyniasoh lang bad ki iew rit kum ki Micro, Small and Medium Enterprises (MSME) na kane ka jylla bad ki nongthied na shabar ka jylla bad na kane ka jylla.
Ha ka jingialang ki lad pathai khubor ha ka sngi ba ar, u Commissioner and Secretary, Commerce and Industries Department, C.V.D. Diengdoh, u la ong ba ia kane ka prokram, la pyniaid hapoh ka jingsdang jong ka Raising and Accelerating MSME Performance (RAMP) ha ka jingiatreilang bad ka Federation of Indian Export Organisations (FIEO).
U la ong ba ka jylla Meghalaya ka don ki MSME kiba la dep registar haduh 98,000 tylli bad ka RBSM kan ai iaka rynsan na ka bynta ka jingiatreilang hapdeng ki iew rit bad ki nongthied ba ka ithuh na India bad nabar ri.
Katkum ka jingiathuh ka tnad, kumba 22 tylli ki nongthied na shabar ri kynthup ka Bangladesh, Canada, America, Uganda, Mauritius, Netherlands, Sri Lanka, Bhutan, England bad Kenya kila dep pyntip ban iashim bynta, ryngkat bad ki nongthied na ka jylla.
Kane ka prokram kan pyni iaki tiar ki tar kiba kynthup iaki jingpyn khreh iaki bam, ka ngap bad ki jingbam ba shet da ka ngap, jingthain jain, jingshna iaki khiew, ka jingoh shrong iaki lyntang bad ki maw, ki bam ba shna na ka bynta ka koit ka khiah bad ka jingshna iaki dawai kynbat bad kiwei kiwei.
U symbud Myntri ba peit iaka Commerce and Industries, u Sniawbhalang Dhar un da plie pyrda ia kane ka prokram ba ar sngi ha ka 8 tarik Risaw kum u shongknor. Katba ka MSME kan pyni iaki mar kaba long ruh kum shi bynta jong kane ka lympung.
Ka tnad ka pynshlur ia bun ki MSME ha ka jylla ban registar bad ban pyndonkam ia kum kine ki rynsan khnang ba ki lah ban pyni iaki iew thymmai, pynroi iaka kam jong ki, pynioh kam ioh jam bad noh synniang na ka bynta ka ioh ka kot ka jylla Meghalaya.
U Director ka Commerce bad Industries, u bah M.L. Wanshnong, ryngkat bad kiwei pat ki heh nongtrei jong ka tnad kila don lang ha katei ka jingialang ki lad pathai khubor.
