Shillong, Nohprah 22: Ka Director General ki Pulit ka jylla Meghalaya ka kong Idashisha Nongrang haba kren mynta ka sngi ka 22 Tarik Nohprah 2025 sha ki pulit kiba dei ki ophisar kiba la wan na kylleng ki jylla ka thain shatei lam mihngi ka Ri India ban shah pyntbit ia lade ha North Eastern Police Academy kaba don ha Lad Umsaw ha Ri Bhoi District kala ong ba lehse khatwei bnai mynshuwa haba poi ha kane ka jaka kin nym tip aiu kin hap ban leh.
Ka Director general ki pulit kala ong ba bun sien kaei kaba phi ioh na ka jinghikai bad kaba ia dei shisha ha ki jingiakynduh kiba man ka sngi ki long kiba iapher, katta kein kaba phi la shah hikai ha kine ki khyndait bnai, kaei kaba phi shah hikai kam da mut eh ba phin ia kynduh ha ki jaka trei kam ki jong phi namar kane ka kam kaba phi la jied ka dei kaba don shibun ki jingialeh.
Ki jingialeh kiba phin ia sa kynduh kam dei tang kiba phi la shah hikai, hynrei kiba bun kin long kiba khlem poi pyrkhat, kala ong ba kane ka uniphom kaba kala phong mynta la 33 snem bad kaba phi ruh phi ia phong long kiba la khreh ban ia kynduh ia kino kino ki jingeh, ki Nongrim kiba phi la ioh na ki jinghikai kin long kum ki mawjam ban btin lynti ha ki jingtrei kam jong phi.
Kane ka kam kaba phi la jied ka long ban aiti ia lade na ka bynta ka ri bad katba dang iaid ki sngi phin sa sngewthuh namar kin don ki khep kiba phin nym la khreh lypa, hynrei kin sa sngewthuh bad ka don ka jingkyrmen ba da ka jingkit khlieh bad ka jingaiti lade phin sa lah ban leh lyngba ki jinghikai kiba phi la ioh bad haba phi mih na kane ka jaka ai jinghikai ka NEPA kum u pulit ophisar phi dei ban kynmaw ba ym dei ba phi lang tang kum u ophisar hynrei ka kam ka long arphewsaw kynta.
Kiba la wan shah hikai pyntbit ha NEPA na ki 10 tylli ki jylla ka Ri India ki long 66 ngut bad ha kane ka kynti kaba mynta na ka jylla Meghalaya ki don 15 ngut ki pulit ophisar kiba la shah jied ban ioh ia ka jinghikai kaba kyrpang ha katei ka jaka hikai.
