Shillong Rymphang 17 : Ki Nongïalam jong ka Dorbar ki Syiem, ki Lyngdoh, ki Basan jong ki khat Ar Raid saw ksing saw lama sarikrai Hima Khyrim ki la pynpaw ia ka jingpyrshah bad ka jingbym sngew iahap ia ka Khyrim act.
Ki Nongialam ki la pynpaw ruh ba naduh une u snem ba mynta na ka liang kine ki Khat Ar Raid kim kwah shuh ban ïa shimbynta ha ka lehniam pomblang ka ba la juh pynlong da u Syiem ka Hima Khyrim.
Ha ka jingiakren bad ki nongthoh khubor u Bah NL Wahplang u ba dei u Basan ka Raid Namsha u ba long ruh kum u Nongaiktien u la ong ba ngi kum ki nongialam jong ki 12 Raid ngi da sngew pyrshah ïa ki lai tylli ki kyndon kata ka jingpynduh ïa ka kyrteng Raid sha Ribhoi na ka bynta ki 12 Raid ha ka jaka jong kine ki 12 Raid yntip noh ba kin long tang kum ki Shnad Raid, kaba ar ka long ban pynduh ïa ka bor trei kam jong ki ban peit ia ka khyndew ka shyiap ban register bad ban peit ia kino kino ki jingia kajia jaka hapoh ka raid bad la pynduh ruh ïa ka kyrteng jong shibun ki longkur kiba dei ki longsan jong ka raid kiba haduh mynta ruh ki dang dei ki Basan jong ka Raid.
“Ngi la leit ban buh da ka jingthoh ha khmat u Chairman jong ka Khasi Hills Autonomous District Council ban kyrpad ban peit bniah halor kine ki lai tylli ki kyndon ki ba kum ka kynhun ki la dawa” u la ong.
“ Kat kum karai ba ngi la shim lada ym pat weng ia kine ki lai tylli ki kyndon ki ba kthah matïong ïa ngi, ngin weng noh ia ka jingiatrei lang bad u Syiem Hima Khyrim kum ïa ka jingai blang, ba kan ym don shuh ka jingthoh phlang na kine ki Raid bad ngi la kyrpad sha baroh ki Rangbah Shnong ba kin ym ai shuh ïa u synñiang- u bynhei na ka bynta ka lehniam Pomblang” u la ong.
U Bah Wahplang u la ong ruh ba na ka liang u Syiem ka Hima Khyrim u la phone la ia ngi ba u la don ka jingbakla hynrei na ka liang jong ki kim shym la kubur hynrei ki kwah ba na ka liang U Syiem u dei ban pynbeit bad weng noh ïa ki kyndon ki ba long pyrshah ïa ki Raid.
U Bah Wahplang u la pynshai ruh ba ha kine ki snem bala leit noh ki synshar ki Basan kisyiem Raid ha ba don kino kino ki ba pan ban ‘register’ ïa ki khyndew ki shyiap ki Basan ki ai ïa ki dulir bad ki saleit sha u Syiem.
U la ong ruh ba la da don kino kino ki jingïa kajia jaka-puta na ka liang ki Basan ki leit ban pynbeit kum ba ka long. U la ong ruh ba bun na ki longkur ki ba mynta ki la long ki longsan ki la jah kyrtenglut kaba la ktah matïong ia ki Basan.
