Shillong, Lber 12: Ki pulit jong ka Khliehriat ha dien ba kila ioh jingtip kila pynlong ia ka jingkhynra kaba kyrpang bad ha kane ka jingkhynra la ioh ban kem hynriew ngut ki nonglute ba snar bad na ki ki pulit kila ioh ban kurup suloi, Magazine, ki wait bad ki kuli.
Ka jingioh kem ki pulit ia kitei ki nonglute ka dei ha dien ba kila ioh ban kem ia u bah Rynsong na kawei ka jaka rieh kaba dei na jan ka shnong Umlawang kaba hap hapoh jong ka East Jaintia Hills District.
Ha kane ka jingleit ban khynra ia katei ka iing bad ia u tei u briew ba la shah kynnoh la kem bad na iing sah jong u la ioh ban kurup kawei ka suloi AK-47, 14 tylli ki kili ba khlem pat pyndon kam, ka Bike kaba don ia u number AS 27 D 2482 na iing sah jong u la ioh ban kurup ruh shibun ki kot ki sla.
Na ka jingtoh kit ha dien bala kem ia u tei u briew na Umlawang, ki pulit kila hiar sha Guwahati bad da ka jingiarap ki pulit Assam la iohban kem ia u ia u Jotish Daimary 43 snem, u Bipul Basumatry 37 snem, u Shankar Boro 35 snem kine ki dei na Udalguri, u Sansoma Mooshahary 32 na Chirang, u Fajal Haque 33 snem na Guwahati.
Kane ka jingkem jong ki pulit ia kitei ki briew baroh ka long halor ka jingtohkit ha kaba ia dei bad ka jingshah lute ki Petrol pump ha Meghalaya kawei na Ri Bhoi, Shillong bad Khliehriat, na ka liang jong ki pulit kila pynlong ia ka jingtohkit kaba bniah haduh ban da ioh kem ia kitei ki nonglute.
