Shillong, Iaiong 19: Ki pulit jong ka Khliehriat kila ioh ia ka jingujor na kawei ka khynnah kynthei ba u samla jong ka u la thad ia ka video kaba kala phah sha u samla jong ka kumba u la kyrpad. Ia kane ka jingujor la ai sha ki pulit ha ka miet sngi Balang.
Katkum ka jingujor la ong ba kane ka Video kaba kala phah sha u samla jong ka dei kaba kala ring hi, da ka jingshaniah ia la u jong u samla ka phah bad kam shym poi pyrhat ba u samla jong ka un thad ia ka video jong ka sha ki paralok.
U Bah Gilbert AL Marshillong Deputy Superintendent jong ki pulit hapoh jong ka East Jiantia Hills District u la iathuh ha dien ba kila ioh ia kane ka jingujor kila leit ban wad ia u ne u samla jong ka bad la ioh ban kem na ka shnong Wapung.
Na ka liang jong ki pulit kila pyngad ia une khynnah samla hapoh jong ka kyndon 66(E) jong ka ain Information Technology bad hapoh ka kyndon 420/ 506 jong ka IPC. Na ka liang jong u tei u heh pulit la ong ba la buhrieh noh ia ka kyrteng jong ki namar ba ki dang dei ki khynnah.
