Shillong, Jymmang 27: U Superintendent ki pulit jong ka Ri Bhoi District la pyntip ba kila ioh ban kem ia u bah Phurly Suting 52 snem ka rta na ka shnong Umtasor , Birksuid Ri Bhoi District, ka jingkem ka long katkum ka ejahar kaba la register hapoh Nongpoh Police Station Case No. 50(5)2024 U/S 451/302 IPC on 24.05.2024.
Ki pulit kila rah ia u sha iing bishar bad ka iing bishar kala shah ia ki butlit ba kin bat lai sngi ha kti jong ki ban tohkit, u ba la shah kem kaba u dang don ha kti ki pulit u la pyni ia ka jingklumar jngmut jong u da kaba iam bad ia leh ban kyrthad.
Haba iohi ia kane ka jingleh ki pulit kila rah sha Civil Hospital Nongpoh ban phah sumar, ha dien bala eksamin na ka liang jong ki dotkor kila bthah ban pynkit noh sha Shillong hapoh MIMHANS sha Shillong, hynrei kaba sngewsih ynda poi sha katei ka jaka ai jingsumar la pynbna ba u ka khlad.
Ia ka met iap jong u bah khlad la rah sha Shillong Civil Hospital Shillong bad la buh ia ka met jong u ha ka jaka buh met iap, ia ka jingpeit bniah ia ka met iap la leh da kaba ring Video ha ka jingdon lang ki Magistrate na East Khasi Hills District bad ka jingdon lang ki doktor bad la pyndep ruh ia post mortem.
Na ka liang jong ki pulit kila bud ryntih ia ki kyndon jong ka National Human Right Commission haba pyndep ia kaba don kam. Haba ia dei bad kane ka jingjia la register ia ka ejahar hapoh Umiam Police Station hapoh ka kyndon UD Case No.14/2024 dated 26.05.2024 bad ka jingtohkit halor kane kan dang iaid.
