Shillong, Nailar 16: Ka jylla Meghalaya kala rakhe ia ka “12th National Handloom Week” ha Ri Bhoi District ha Nongpoh ha kaba la pyni ia ki jain kiba la thain hi da ka kti haka jaka Integrated Textile Tourism Complex ha Ri Sai, Nongpoh.
U myntri rangbah ka jylla u Conrad K Sangma haba kren ha ka sngi Saitjian 14/08/2026 u pynpaw ia ka jingsngewnguh ia baroh kito kiba la don bynta ban pynneh pynsah ia kane ka thain jain tynrai bad kiba la ai ka jingkyrshan wat ha pdeng ki jingeh.
Ki jain kiba la pyninam ha kane ka taiew thain jain kiba la thain hi na kane ka jylla ki long kum ka jain, Dakmanda, Dharashat, Mukhli, bad Thoseru, kine kim tang kita ki jain kiba pynitynna hynrei ki kren ia ka thymmai jong ka jaidbynriew ha ka jylla, ka jingkyrshan ka sorkar kam dei tang ban kamai hynrei ka long ban pynneh pynsah ia ka thymmei bad u da sngewsarong iala ka jong ka tynrai.
U myntri rangbah u la ong ba ha kine ki hynniew snem kiba la dep ka sorkar kala trei bor bah ban pynneh pynsah ia ka tynrai, ki riti ki dustur, ka ktien ka thylliej bad ia kaei kaba ka jylla ka don bad u la ong ba ia ka ktien garo bad Khasi la ithuh mynta kum ka ktien sorkar.
Ka sorkar kala ai jingkyrshan sha ki 50000 tylli ki long iing, na kine 70% kiba trei dei ki kynthei, tang ha Ri Bhoi ki don 4000 tylli ki long iing kiba la resgister bad na kine 3200 tylli kiba register ban thain ia ki jain Ryndia bad 90% kiba trei dei ki kynthei bad ka Umden-Diwon la ithuh kum ka ‘Eri Silk Village’ kaba nyngkong ha ka jylla.
Ha katei ka sngi u myntri rangbah ka jylla u la pynher ia ka lam lai rong ka ri, ha kane ka sngi la donlang u myntri ba dei peit ia ki kam thain jain, u bah Metbah Lyngdoh, bah Mayral Born Syiem MLA, kong Rona Khymdeit MDC, u Chief Secretary bad kiwei kiwei ki heh sorkar kila don lang.
