Shillong, Jylliew 01: Ka ophis jong ka Meghalaya State Disaster Management Authority (MSDMA) kala pyntip ba ha kine kine ki sngi na ka daw jong ka jingslap jur ki shnong kiba la shah ktah baroh ki long 86 tylli bad ki iing kiba la shah pynjot ki long 37 tylli.
Ki jingshna jong ka sorkar kiba la shah pynjulor baroh ki long 45 tylli, kine ki kynthup ia ki surok, ki iing sorkar, ki block kiba la shah ktah baroh ki long 23 tylli bad ki birew kiba la shah ktah na kane ka jinglynshop ka mariang ki long 1221 ngut.
Mynta ka sngi 1/Jylliew/ 2025 kala don ka jingtwa khyndew ha Ri Bhoi District ha ki ar tylli ki jaka, kata ha ka shnong Umskun bad ar tylli ki jaka ha ka surok Umjari-Umtrai kine baroh ki dei ha Ri Bhoi District.
Na ka liang jong ka sorkar kala bthah ia ka ophi jong ka PWD kaba hap hapoh jong ka Nongpoh PWD Division ban pynkhuid kloi ia ka jingtwa khyndew bad ha ka juh ka por ba kin kynto da kaba pyndap khyndew ha ki borni plasting ban pynneh shipor ia ka surok.
