Shillong, Jymmang 07: U Principal secretary ka tnad ri jing ri jong ka sorkar Meghalaya u HGP Raju u la ong ba ka jylla Meghalaya ha ka shisnem kabam dohsniang kumba 18000 metrik tone, haba ia dei bad kane ka bynta ka iew ban die kala don lypa kumta la khot ia ki kompeni ba kin wan ban bei pisa sha kane ka jylla ha kane ka kam ri sniang.
Haba kren ha ka jingialang mynta ka sngi ha Polo la ong ba lada ki wan ban bei pisa sha kane ka jylla ka long ba kin shna ia ki jaka ri sniang kin pyniaid iew da kaba song ia ki ha ka rukom kaba khuid ba suba namar kam don kam ban wan rah shniang na sha bar hynrei kila don lypa ki sniang na kane ka jylla.
Kine ki sniang kiba na kane ka jylla Meghalaya ki kham rit, ki duna ka kshong hynrei ki long kiba bang bha, kine ki sniang ki kham suki ba kin heh kin san hynrei ki long kiba bang shisha ban bam bad ka jingdawa ia kine ki sniang ha iew ka long kaba jur bha.
Na ka liang jong u Principal Secretary jong ka jylla u khot u wer ia ki kompeni kiba kwah ban wan bei pisa ha kaba ia dei bad ka kam ban song ia ki doh lada ki wan sha ka jylla Meghalya kyrpang na ka bynta ia ka doh sniang ka iew kala don lypa kim dei ban khuslai ia ka iew.
U Raju u ong ba ka jingdon kam ki paidbah ia ka doh ha kane ka jylla kam dei tang doh sniang hynrei ka doh masi, ka doh kha ruh kum juh ka jingdawa ia ka doh ha kane ka jylla ka long kaba jur bha, u khot u wer ia ki kompeni ban wanrah ia ki kor ki bor ha kane ka jylla ban pynmih ia ki doh bala song na kane ka jylla.
