Shillong, Jymmang 09: U Symbut Myntri Rangbah ka jylla u bah Prestone Tynsong u la iathuh ba ka sorkar Assam kala pyntip sha ka sorkar Meghalaya ba la don u wei u Doktor hapoh jong ka Guwahati Medical College u ba la test Positive bad u wei la khlad noh na ka jingpang COVID-19 na ka Dr B. Borooah Cancer Institute Guwahati ha ka 07/05/2020.
Haba ia dei bad kane ka sorkar Meghalaya kala kyntu ia baroh kito kiba leit shah sumar ne shim dawai na ka GMC Medical College bad Dr B Bruah Cancer Institute Guwahati naduh ka 23th Iaiong 2020 kin sngewbha ban pyntip sha ka sorkar hapoh u number 108 khnang ba ka sorkar kan ioh ban leh ia kaba don kam.
U Bah Prestone u la batai shai kdar ba ki ban phone sha u 108 dei tang kito kiba leit sha kitei ki hospital ar tylli kiba shah sumar lane kiba leit ban shim dawai. Ia kiwei kiwei kiba leit sha kiwei ki hospital kim don kam ban pyntip.
U Symbut Myntri Rangbah u la ong ba ha dien ba kila ioh ia ka jingpyntip ka sorkar kan sa phone sha kin a ka bynta ba ka sorkar kan leh ia kaba don kam. Ha ka juh ka por na ka liang jong u myntri u la kyntu ia ki paidbah ba kim dei ban syier ban smiej ka sorkar ka don ryngkat bad u paidbah.
