Shillong, Jymmang 24: Mynta ka sngi ka Meghalaya Board Of School Education kala pynbna ia ka results Secondary School Leaving Certificate (SSLC) 2024, ha kaba ka jingpass jong ki khynnah ka long tang 55.80% ban ia nujor bad u snem 2023 kala kham bha namar ha ka snem bala dep kiba pass ki long tang 51.93%.
Ki samla kiba la thoh ia kane ka eksamin SSLC baroh ki long 54134 ngut, kiba pass ki long 30,208 ngut kaba mut kiba pass ki long tang 55.80%, kane la kynthup lang ia ki ba thoh regular bad kiba thoh private, na kine ki shynrang ki pass ki long 12657 ngut, ki kynthei kiba pass baroh ki long 17551 ngut.
Na kine ki 30,208 ngut kiba la pass ha baroh hynriew tylli ki subject ki long 17,504 ngut, kiba pass ha ki san subjek ki long 12,704 ngut, na ki District kiba bun eh kiba pass dei ka West Jaintia Hills 78.34 %, kaba duna eh kiba pass dei ka North Garo Hills District tang 23%.
Ka jingpass jong ki khynnah ha kine ki san snem lynter kalong ha u snem 2020 ka long tang 50.31%, ha u snem 2021 kiba pass ki long tang 52.90%, ha u snem 2022 kiba pass ki long tang 56.96%, ha u snem 2023 ki long tang 51.93% bad mynta u snem 2023 ki long tang 55.80%.
Na ki 679 tylli ki skul kiba dei SSLC, ki skul kiba pass 100% ki don 172 tylli, ki ksul kiba duna eh ka jingpass ki long , ki don pat hynriew tylli ki kiba khlem pass ki khynnah kaba ki ioh 0%,ki don ruh ki ki skul kiba pass tang 1%.
Ki skul kiba khlem pass ki khynnah ki long, ka Thakimagiri Secondary School, Phulbari kala phah 18 ngut, ka Sabakhthani Secondary School, Musniang Rim ka phah 5, ka Resubelpara Govt. Higher Secondary School, Resubelpara ka phah 19 ngut.
Ka Pragatipur Secondary School, Pragatipur ka phah 18 ngut, ka Marshilong Presbyterian Secondary School, Marshilong ka phah 11, ka Bhaitbari Girls’ Secondary School, Bhaitbari ka phah saw ngut 4 hynrei na kine ki hynriew tylli ki skul ym don ki khynnah kiba pass ia ka SSLC eksam.
