Shillong, Iaiong 05: Ka kynhun ki rangbiria ka Laitkyrhong ‘B’ (Hima Khyrim) bad u Balastar Rynjah na Hima Khyrim ki long ka kynhun lahduh ne u namtam ha ka sngi jong ka iakob siat khnam Rongbiria Ki Hima Ka Ri Hynñiewtrep kaba 31 kaba la pynlong ia ka da ka Apphira Archery Committee, ha madan 2nd Ground, Polo, Shillong, kaba la long hynnin ka sngi ka 4 tarik u Iaiong 2024.
Ha ka jingiakhun kba para marwei ki rangbiria baroh kiba la mih madan ban iashim bynta ki 262 katba ha ka jingiakob siat kynhun la iashim bynta da 74 tylli ki kynhun.
Ka jingiakhun kaba itynnad bad ba iakhaid bha ka dei ha ka phainal ka iakob siat kynhun hadien ba ha ka kylla iakhun kaba nyngkong ki rangbiria jong ka Laitkyrhong ‘B’ Hima Khyrim ba la mihkhmat da u Shailangstar Khongsngi.
U Kobinroy Khongsi bad u Teiborlang Warbah ki la la lah ban shu jop salit tang da shi khnam pyrshah ia ka kynhun ki rangbiria jong ka JTC ka Hima Khyrim, ba la mih khmat da u Justwell Nongspung, u Chesterling Kharumnuid bad u Teirius Marbaniang ha kaba ka jingiakhun hapdeng ki rangbiria jong kine ki artylli ki hima ka kut noh da 5-4.
Haba phai pat sha ka iakob siat kaba para marwei nalor u Balatstar Rynjah uba la rah ia ka nam kum u namtam ne u lahduh jong kane ka jingiakob, u Bankerlang Kharduit ka Hima Mylliem bad u Batskhem Ïawphniaw na Hima Mylliem ki la wan ban bat ia ka kyrdan kaba ar bad kaba lai jong kane ka jingiakob.
Ha kane ka kynti ka khusnam sha ka Hima kaba la rah ia ka nam kum ki lahduh ha ka iakob siat kynhun ka long 35 hajar tyngka, katba kaba wan ba-ar bad ba lai ki la ioh ban khung ia ka song pisa kaba long 15 hajar bad mar 5 hajar tyngka.
Nalor katta ka kynhun ka Laitkyrhong ‘B’ ka Hima Khyrim ka la ioh ba kan rah ia ka nam jong ka stieh Bormanik Syiem kaba dei ka nongkynti jong ka komiti, ia kaba la ai sngewbha noh pat sha kane ka kynhun da ka stieh khun (replica).
Haba phai sha ka iakob siat kaba para marwei ka khusnam pisa u nam tam ne lahduh ka long 15 hajar tyngka ryngkat bad u nam’ rupa’, katba u Bankerlang bad u Batskhem kiba wan ban bat ia ka kyrdan kaba ar bad kaba lai, ki la ioh ba kin khung ia ka song pisa kaba 7 hajar bad 3 hajar tyngka.
Ha kane ka sngi ki la don ar bynta ki prokram ha kaba ha ka por mynstep kaba dei ka pali ka jingpynher lama ia kane ka jingiakob u kongsan ba la wan ban ia don lang dei u Pa’iem Ainam Manik Syiem, Syiem ka Hima Mylliem bad ha ka por janmiet pat kaba dei ka bynta kaba ar kaba sam ia ki khusnam sha ki nongjop u kongsan ba la wan ban ia sakhi lang dei u Deputy Syiem ka Hima Nongkhlaw u Pa’iem Kestonbel Manik Syiemlieh.
Ha shwa ka jingsdang ia ka jingiakob, ka la don ruh ka nguh ka dem kaba la pyndep da u riew tymmen riew san u Rgh Skor jala ia kaba la pynshit pynshngain ia kane ka sngi da ka jingiadon lang ki khmat rangbah nongialam jong ka Seng Khasi Kmie, Seng Khasi Mawlai, Seng Khasi Pynthorumkhrah, Seng Khasi Ri Raij Laban, ki dkhot nongkit kam ka Apphira Archery Committee, katba ia ka jingialang la pyniaid ia ka da u Rgh Paia B Synrem.
Na ka liang ka Apphira Archery Committee ka shim ia kane ka kabu ba kan ai khublei kyrpang ia ka ophis u Deputy Commissioner uba la ai jingbit ban pynlong ia kane ka rongbiria, nangta ia ka Centre Point Group of Enterprise (CPGE) bad kumjuh ia ki bor kiba dei khmih ka Shillong Recreation Ground Trust bad kumjuh ia ka Shillong sports Association ban ioh ban pyndonkam ia ka madan Polo.
Ka jingai khublei ka leit ruh sha baroh ki rangbiria jong ka bri Hynñiewtrep Hynñiewskum, kiba la poi ryntih lang shriak ban wan iashim bynta bad pynphuh pynphieng kaba da shisha ka da long artad ka sngi kaba jop bad ka dak jong ka jingtehsong ia ka ri bad ka jaidbynriew.
