Shillong, Naitung 20: Mynta ka sngi ka seng Hynniewtrep Youth Council (HYC) kala leit ban ia kynduh ia u symbut myntri rangbah ka jylla u bah Prestone Tynsong ban kyrpad ia ka sorkar ban tuklar lem ha kaba ia dei bad ka Assam Cattle Preservation Bill, 2021 namar kane ka Bill ynda kala kylla ain kan ktah ia ka jylla Meghalaya.
Haba kren ha ki lat pathai khubor ha dien ka jingiakynduh ia u synbut mytnri rangbah u president ka seng u bah Robert Kharjahrin la ong ba lada katei ka ain kaba la pdiang da ka sorkar Assam kan ktah bha ia ka jylla Meghalaya katkum ka kyndon kaba hynniew, kane ka kyndon ka kren shai ba lada kit masi sha Meghalaya hap ban pan jingbit na ka sorkar Assam.
U bah Robert u la ong ba kane ka jingleh jong ka jylla Assam ka dei kaba long bei ain pyrshah ia ka riti synshar jong ka Ri India, namar katkum ka riti synshar kawei ka jylla kam lah ban khang ia ka jingiaid ka khaii pateng na kawei ka jylla sha kawei pat.
U bah Robert u la ong ba lada kane ka bill jong ka sorkar Assam kan kylla long ka ain kan ktah khamtam ia ka jylla Meghalaya kaba hap ban wanrah ia ki mrad na shabar ka jylla ban pynbiang ia ka doh ha kane ka jylla.
U bah Robert u la ong ba ha kane ka jingiakynduh ka seng kala ai jingmut ia ka sorkar ba ka dei ban pynshlur ia ki briew da kaba airam ban ri jingri khlem da khien sut, la ong ba ka ka jylla kan myn lah ban shu shniah beit ia ka bam na kiwei ki jylla.
La iathuh ba ha kane ka jingiakynduh na ka liang jong u symbut myntri rangbah ka jylla u la kular ia ka seng HYC ba ka sorkar kan sa tuklar ia kane ka bill jong ka jylla Assam namar kan ktah ia ka jylla Meghalaya.
